Bilaketa aurreratua

Ogi apurrak

Egungo Euskararen Hiztegia (EEH)

Hasiera:

imajinatu (orobat imaginatu g.er.; Hiztegi Batuan imajinatu agertzen da), imajina, imajinatzen 1 iz irudikatu. (norbait)

Imajina ezazue Evans andrea mahai baten azpian gordeta. Koro Navarro   «Artistakume baten erretratua» - Dylan Thomas - 147. orr.

Michèle imajinatzen dut, biolontxeloa jotzen. Xabier Mendiguren Elizegi   «Errautsen distira» - 147. orr.

Esku luze finekin eta kontzerturako jantzian imajinatu nuen neska, pianoa niretzat bakarrik jotzen ari zela. Anjel Lertxundi   «Ihes betea» - 42. orr.

Hitz haiek entzun orduko, aita imajinatu nuen nik, aitzurra jasota eta adi-adi, satorra aitzur-buruaz jotzeko lorategiko lurra mugitzen ikusitakoan. Anjel Lertxundi   «Ihes betea» - 309. orr.

Klara bere giltzen bilaketa alferrean imajinatu nuen. Aingeru Epaltza   «Rock'n'roll» - 264. orr.

Irribarrez imajinatu nuen, alu zikina, haren betaurrekoak bezain beltzak ziren kotxe ofizialeko kristal ilunen atzetik. Aingeru Epaltza   «Rock'n'roll» - 74. orr.

Amagoia nire anaiaren txabusina zaharra bertze jantzirik ez zuela imajinatu nuen istant batez. Aingeru Epaltza   «Rock'n'roll» - 102. orr.

Bere zira transparentearekin jantzita imajinatu nuen, opari bila Hayes edo Union Squareko dendetan. Bernardo Atxaga   «Soinujolearen semea» - 42. orr.

Ohean etzanda imajinatu nuen, deskantsatzen, oinutsik. Bernardo Atxaga   «Soinujolearen semea» - 44. orr.

Ez Charly ez Ximurra imajinatzen ahal nituen egunkari bat eskuetan zutela. Aingeru Epaltza   «Rock'n'roll» - 209. orr.

Imajinatu dezaket tipoa txisteen kontrako elkarte bat sortzen -Gizon Serioen Batzarraren Eliza Unibertsala-. Karlos Zabala   «Buda zoriontsuen etxea» - João Ubaldo Ribeiro - 149. orr.

Zergatik ez imajinatu, esate baterako, Aita Gojenola, 60 urte betetzetik gertu, krisi existentzialak jota? Iñaki Iñurrieta   «Kuskue tanden» - 141. orr.

Emaztearen ondoan imajinatzen zaitut, ez dakit hala zauden baina. Xabier Mendiguren Elizegi   «Arima enkoniatuak» - 49. orr.

Neskaren magalean atsedendurik imajinatu zuen bere burua. Anjel Lertxundi   «Azkenaz beste» - 104. orr.

Edo metro-geltoki hartan, metro aurrean erortzen imajinatu zenuenean zeure burua. Lourdes Oñederra   «Eta emakumeari sugeak esan zion» - 159. orr.

2 (zerbait)

Labirintoen labirinto bat imajinatu nuen, labirinto bihurgunetsu gero eta handiago bat. Juan Garzia   «Ipuin hautatuak» - Jorge Luis Borges - 74. orr.

Ez dakit hasperena entzun ala imajinatu egin nuen-. Bernardo Atxaga   «Soinujolearen semea» - 115. orr.

Nire eskuak papar beltxaran horretan beheiti imajinatu nituen, guri sumatzen nuen larruazalaren beroaren hurrupatzaile. Aingeru Epaltza   «Rock'n'roll» - 49. orr.

Eta imajina dezaket udazkeneko arratsa Central Parkeko xendra orbeltsuetan. Joxerra Garzia   «Egonean doazen geziak» - 117. orr.

Imajina dezagun Oteizaren nerabezaroko eszena hipotetiko bat. Anjel Lertxundi   «Mentura dugun artean» - 131. orr.

Gain zabal eta beratz horretan, nire andrearen eta Ximurraren arteko zilipurdiak imajinatu nituen. Aingeru Epaltza   «Rock'n'roll» - 362. orr.

Hartan ari zela, maniobra txarren bat egin eta inoiz imajinatuko ez nukeena gertatu zen: [...]. Anjel Lertxundi   «Ihes betea» - 320. orr.

Baina bat-batean emakume-hots imajina daitezkeen finenak entzun ditut. Anjel Lertxundi   «Italia, bizitza hizpide» - 70. orr.

Furgoi beltzean itzaleratu zutenean, gilotinaren mihi fin eta zorrotza lepondoan hotz lerratzen imajinatu eta trenputxartu zen. Itxaro Borda   «Zeruetako erresuma» - 89. orr.

Bere bizitza imajinatu zuen haietako etxe batean Andreasekin bizitzen jarririk. Anjel Lertxundi   «Azkenaz beste» - 157. orr.

Plaza osoa poliziaz beterik imajinatu zuen. Pedro Alberdi   «Kafka Bilbon» - 51. orr.

Imajinatu egoera: Mutila zutik neskari begira, hautsonzia zigarro-muturrez beteta, eta Carme, amorratuta, minduta, dena pikutara bidaltzeko prest, Mutilari begira. Adibidez, euskararen desagerpena gauzatuko dela, hori hain epe laburrean nola gerta daitekeen ez dakidan arren; edo, zerbait gauzagarriagoa imajinatzearren, une horretan bertan amaituko dela euskal literatura. Iban Zaldua   «Itzalak» - 177. orr.

3 (mendeko perpausekin)

Imajinatu dezaket nola egiten duten, baina gustura ikusiko nuke. Karlos Zabala   «Buda zoriontsuen etxea» - João Ubaldo Ribeiro - 55. orr.

Imajinatzen dut zer datorren. Anjel Lertxundi   «Zorion perfektua» - 12. orr.

Ez dut imajinatu nahi zer espero didan agertzen ez bada. Migel Angel Mintegi   «Denak du bere prezioa» - 33. orr.

Esku artean hartu eta zabaldu bitartean ez nuen imajinatzen ere zer topatuko nuen barruan. Xabier Mendiguren Elizegi   «Arima enkoniatuak» - 11. orr.

Aise imajinatuko duk orain nola hartu zuten nire ihesaldia. Anjel Lertxundi   «Ihes betea» - 247. orr.

Odola kopetan behera zetorkiola imajinatu zuen. Itxaro Borda   «Zeruetako erresuma» - 339. orr.

Imajinatu zuten gizon oro bi gizon dela eta benetakoa bestea dela, zeruan dagoena. Juan Garzia   «Ipuin hautatuak» - Jorge Luis Borges - 141. orr.

Imajinatu ez dela deus aldatu. Monika Etxebarria   «Goragalea» - Jean Paul Sartre - 232. orr.

Imajinatu nuen eskumuturrean, erlojuaren lekuan, aparatu berezi bat neramala, zunda moduko bat, itsasoaren edo ibai baten sakonera neurtu beharrean, puntu geografiko bakoitzaren denbora-sakonera kalkulatzen zuena. Bernardo Atxaga   «Lekuak» - 40. orr.

Imajinatzen dut gomazko eskularruak dituen gizon zuriz jantzitako batek astintzen nauen bitartean oihu egiten didala: "Ni ez naiz iturgina!". Joseba Urteaga   «Gertakizuna» - Annie Ernaux - 70. orr.

Egiteko latz bat aurrera atera nahi duenak hura jadanik burutua duela imajinatu behar du, iragana bezala aldaezina den etorkizun bat inposatu behar dio bere buruari. Juan Garzia   «Ipuin hautatuak» - Jorge Luis Borges - 73. orr.

"Zeinek imajinatu, etxe txar honek honelako gela bat izan behar zuenik!", esan nien lagunei. Bernardo Atxaga   «Lekuak» - 219. orr.

Erraz imajinatu genuen gutxi falta izan genuela arrain haiek bezala geratzeko. Juan Kruz Igerabide   «Nire aitaren fusila» - Hiner Saleem - 27. orr.

Gaur goizean jantzi naizenean ez dut imajinatu eskuetan edukiko nuenik. Bernardo Atxaga   «Soinujolearen semea» - 152. orr.

4 (mendeko perpausetan)

Berak pentsatu bezain gozoa zuen ahotsa, tabernari konfiantza gehiegizkoarekin eta maila beheragoko emakume haiekin jolas alai eta urdurietan ibili aurretik imajinatu zuen bezalakoxea. Koro Navarro   «Artistakume baten erretratua» - Dylan Thomas - 220. orr.

Nik imajinatu baino lodixeagoak ziren, nik amestu baino motzagoak. Jasone Osoro   «Korapiloak» - 82. orr.

Imajinatu bezain primitiboa iruditu zitzaidan. Iban Zaldua   «Itzalak» - 120. orr.

Harryk sakon gogoeta egin zuen, Halloween-gauean zer gertatu ote zen imajinatu nahian. Iñaki Mendiguren   «Harry Potter eta sekretuen ganbera» - J.K. Rowling - 244. orr.

Lizarriturrik hatzen mugimenduaren laguntzaz pentsatu egiten du, burutazioak imajinaturiko musika baten harira helduko balitzaizkio bezala. Pako Aristi   «Urregilearen orduak» - 28. orr.

Berak imajinatutako mugimenduak burutzen dituela. Berria - Kultura   2004-04-18

Beste begi baten pertzepzioaren arabera imajinatutako tresna besterik ez, hodei bat, kea. Jon Alonso   «Erretzaileen eremua» - 51. orr.

Honakoan Credenceko abeslaria nintzela imajinatuz etorri nauk: Oh Susie Q, oh Susie Q... Bernardo Atxaga   «Soinujolearen semea» - 373. orr.

Mendekuaren zapore gozoa dastatu nuen, Isabel Sanjoseren muturra imajinatuz. Aingeru Epaltza   «Rock'n'roll» - 79. orr.

Ezereza imajinatzeko, beharrezkoa zen bertan egotea, munduan bete-betean eta begiak zabal-zabalik eta bizirik. Monika Etxebarria   «Goragalea» - Jean Paul Sartre - 221. orr.

Berehala hasi da Ines biluzik imajinatzen. Patxi Iturritegi   «Behi eroak» - 148. orr.

5 (ezin-ekin)

Ezin nuen bizitza imajinatu etxetik, hiritik kanpo. Anjel Lertxundi   «Ihes betea» - 151. orr.

Amona Erikarengatik izan ez balitz, ezin dut imajinatu zein bide hartuko zuen nire bizitzak. Anjel Lertxundi   «Ihes betea» - 158. orr.

Ezin duzu ezta imajinatu ere, Walter: beren amatxorengana bezalaxe inguratzen zaizkizu, izugarria da! Joxe Austin Arrieta   «Homo Faber» - Max Frisch - 161. orr.

Han, imajinatu ere ezin duzuen zerbait dago. Jon Maia   «Riomundo» - 40. orr.

-Ama ikasle -esan zuen-, ezin dut imajinatu ere egin, ama gelaska batean bizitzen, ganbara batean, zuk esan bezala... horretaz ez dit sekula ezer kontatu. Baina sartu zuenean, sekulako oinazea sentitu nuen, ezin imajinatu hura baino oinaze biziagorik. Joxe Austin Arrieta   «Homo Faber» - Max Frisch - 180. orr.

Esku bat luzatu zuen ohe ondoko argia pizteko, mugimendu harekin bere bizitzari amaiera emango ziola imajinatu ezinik. Aitor Arana   «Bost ahizpa» - 89. orr.

6 (era burutua izenongo gisa)

Bizitza imajinatuak. 10214

Azkenean, zabar apurtzen nuen eszena imajinatuaren lilura. Patxi Zubizarreta   «Pospolo kaxa bat bezala» - 38. orr.

Bere imajinarioa asmatu behar baitzaio "Nazio espainol" berriari, haren nortasun augusto imajinatuaren duina alegia, mistikoa, ezen ez historiko, ez soziologiko eta ez politiko erreala. Joxe Azurmendi   «Espainiaren arimaz» - 9. orr.

7 ezin imajinatuzko

Egia hain begien bistako hori, zenbakiak idatzi eta idazketa hori manipulatuz emaitza sortzea, alegia, ezin imajinatuzkoa zen, berez, garai hartako gizaki gehienentzat -kalkulatzen zekien gutxiengo urriarentzat-. Jon Muñoz   «Loroaren teorema» - Denis Guedj - 281. orr.

Eta, guk ezin imajinatuzko sentsazio horiek... Pablo Sastre   «Eguzkipekoak» - 118. orr.

 



Nodoa: liferay1.lgp.ehu.eus