Iruzkin berriak

    AZPidazki berritu dugu

    Urte amaierarekin batera, AZPidazkiko eduki batzuk berritu egin ditugu. Izan ere, denborak aurrera darrai, aldaketa etengabekoa da Unibertsitatean eta komeni da tarteka baliabideak berritzea eta eguneratzea, zaharkituta geratuko ez badira. Zehazki…

    • AZPidazkiren Interneteko itzulpen-memorietako iturri batzuk eguneratu egin ditugu.
    • Hiztegiko glosategi batzuk berritu eta beste batzuk erantsi egin ditugu: jakintza-arloak, irakasgaiak, titulazioa, ikastegien izenak…
    • Trebakuntza-pilulen ikonoa jarri dugu, ikusgarriagoa egiteko eta nabarmentzeko.

    AZPidazkiren gaineko iradokizunik, oharrik, proposamenik… egin nahi izanez gero, helbide honetan egin ditakezue: azpidazki@ehu.eus. Atseginez eta gustura jasoko ditugu. Mila esker!

    Modela, aukerako itzultzaile automatikoa

    Aspalditik daude martxan itzultzaile automatikoak (Googlerena, Eusko Jaurlaritzarena…), baina orain arteko emaitzak ez ziren nahi edo espero bezain onak, batez ere kalitateari dagokionez. Orain, ordea, zorionez aurrerapauso handi bat eman da Modela proiektuarekin. Izan ere, Modelak, deep learning edo ikaskuntza neuronalean oinarritutako itzulpen-sistema darabil, eta askoz ere emaitza hobeak lortzen ditu.
    Nola funtzionatzen duen ikusteko, sartu hemen eta probatu. Hilean 2.000 hitz (8 orrialde estandar, gutxi gorabehera) bitartean dohainik da.

     

    Euskara Batuaren Eskuliburua

    Aurretik ere mintzagai izan ditugu euskaraz lan egiten lagungarriak diren baliabideak, batez ere UPV/EHUk dauzkanak (ikusi hemen). Gaurkoan, berriz, Euskaltzaindiak argitaratu duen eskuliburuaren berri eman nahi dizuegu.


    Lehendik ere Euskaltzaindiak liburu ugari argitaratu ditu, baina Euskara Batuaren Eskuliburuaren helburua berezia da; izan ere, liburuaren asmo nagusia da orain arteko arau, gomendio nahiz bestelako irizpideak era didaktikoan birformulatzea. Horretarako, alor ugaritako informazioa jasotzen du: lexikoa, kalkoak, ahoskera, ortotipografia… Sarrera bakoitzean argi adierazita dago zer eman duen Euskaltzaindiak arau moduan eta zer ez, zer daukan erabakia eta zer den gomendio edo hobespena, edota non komeni den batasuna egitea. Liburua oso tresna egokia eta lagungarria izango da euskaraz lan egin nahi dugunontzat, kontsultatzeko eta zalantzak argitzeko, irizpide garbi batzuk izateko.
    Eskuliburua Internet bidez ere kontsulta daiteke, Euskaltzaindiaren webgunean baitago, hemen, eta ordenagailura jaisteko aukera ere badago.

    Euskaraldia EHUn?

    Gero eta gehiago ari naiz entzuten eta irakurtzen Euskaraldiaz: esperimentua, ariketa kolektiboa, erabilera handitzea, belarriprestak eta ahobiziak… Azaroaren 23tik abenduaren 3ra arte, euskaldun askoren konpromisoa erakutsiko eta ikusiko dugu nabarmen, eta EHUren barruan ere azaleratuko da, seguru. Aukera ona izango da arrazoietan edo aitzakietan babesten garenok (“zaila da aldatzea”, “beti egin izan dugu horrela”, “Jende gutxik daki-eta”…) aurrerapauso –txiki– bat emateko, euskararen erabileran.
    Nire ustez, AZPko langileok gutxien-gutxienez belarriprestak izan beharko genuke, hau da, guri euskaraz egiteko gonbidapena egin beharko genuke, euskaraz ulertzen dugula adierazi eta egitera gonbidatu. Ez zaizue iruditzen? Animatuko gara parte hartzera? Emango dugu izena? Animo, eta egin klik hemen.

    Naiara

    Saridunak

    Trebakuntza-pilulak eginez gero, arriskua zegoen zerbait tokatzeko, eta baditugu saridunak:

    • Emergentziako bateria bat (5000 MAH), pendrive bat (16 GB) eta UPV/EHUko boltsa bat: Ane Arruza Arrieta (Bilboko Ingeniaritza Eskola, Bizkaiko Campusa).
    • Bidaiatzeko maleta handi bat: Belen Bengoetxea Rementeria (Letren Fakultatea, Arabako Campusa).

    Zorionak biei, eta gainerako guztioi eskerrik asko parte hartzeagatik.

    Hurrena saririk ez da izango (oraingoz), baina animatu nahi zaituztegu trebakuntza-pilulak egiten jarraitzera. Hain zuzen ere, hemen daukazue azkena, laburtzapenak errepasatzekoa.

    Gozatu oporraldiaz, eta dagokizuenean, ongi etorri lanera!

    Zirriborro automatikoa

    Hogei urte baino gehiago pasa dira Xuxenen lehen bertsioa atera zenetik, eta ez alferrik: lehen zuzentzaile ortografikoa besterik ez zena hazi, handitu eta hobetu egin zaigu, eta orain ortografia-akatsak ez ezik, gramatika-akatsak ere harrapatzen ditu. Oso lagungarria da testu zuzenagoak idazteko.

    Eskuratzea oso erraza da, xuxen.eus webgunetik, eta behin instalatuta, ez da beste ezer egin behar, ez bada zuzentzeko hizkuntza egokia aukeratu, bestela alferrik ariko baikara. Gure ordenagailura deskargatuta, hizkuntza-zuzenketa eta -proposamen guztiak balia ditzakegu, zuzentzaileak oker daudenak azpimarratu egingo baitizkigu (gorriz gramatika-akatsak, urdinez edo berdez bestelakoak); halaber, geure hiztegia osatzeko aukera ere izango dugu, Xuxenekin erabiltzeko.

    Horrez gain, pluginak ere eskuragarri daude sistema hauetan guztietan txertatzeko: Openoffice/Libreoffice, Web-nabigatzaileak (Firefox, Chrome eta Internet Explorer) eta InDesign CS6 MAC.

    Azkenik, aukera badago testua webgunean zuzentzeko; horretarako, kopiatu eta itsatsi testua hemen.

    Beraz, instalatu eta erabili Xuxen, zuzenago idazteko!

    Trebatu (eta saritu?)

    AZPidazkiko trebakuntza-pilulek ez dizute gaitzik sendatuko edo arinduko, baina agian lagunduko dizute euskaraz hobeto egiten edo zalantzaren bat argitzen, eta zortea izanez gero, sari bat irabazteko aukera ere izango duzu. Izan ere, ekainaren amaieran bi sari zozkatuko ditugu:
    • Emergentziako bateria bat (5000 MAH), pendrive bat ( 16 GB) eta UPV/EHUko boltsa bat.
    • Bidaiatzeko maleta handi bat.

    Zozketan parte hartzeko, nahikoa da AZPidazkiko pilularen bat egitea, baina UPV/EHUko helbidea adierazita; izan ere, parte hartzeko, ezinbestekoa da UPV/EHUko ikasle, irakasle, ikertzaile edo langilea izatea.
    Hil honetako trebakuntza-pilulan, laburdurak landuko ditugu, eta seguru asko izango duzu laburduren inguruko zalantzaren bat: nola da “eta abar” hitzaren laburdura? Eta “telefonoa” hitzarena? Nola lotu laburdura eta atzizkia? Nola bereizi siglak eta laburdura?… Horiek argitzeko, egin pilula, eta zortea izanez gero, gainera, sari bat egokituko zaizu!

     

    Arrate Atxa. Euskararen eta Etengabeko Prestakuntzaren arloko errektoreordetzako teknikaria.
    AZPidazki taldearen izenean.

    Pilulek saria

    Aurreko batean adierazi genizuen trebakuntza-pilulak egiteagatik UPV/EHUko kideok saria irabazteko aukera geneukala, eta apirilaren 11n egin genuen zozketa.

    Hauek sariak eta saridunak:

    • Emergentziarako bateria (5000 MAH), 16GBko Pendrivea eta UPV/EHUko boltsa. Sariduna: Unai Arribas (TIKetako Gerenteordetza).
    • Elhuyar hiztegi berriaren ale bat. Sariduna: Urtzi Akesolo (Zientzia eta Teknologia Fakultatea).
    • ZIO bildumako Descartesen hutsegitea liburuaren ale bat eta UPV/EHUko Argitalpen Zerbitzuan argitaratutako Arte zinematografikoa liburuaren ale bat. Sarduna: Cristina Pujana (Bizkaiko Campuseko Gerenteordetza).

    Hiruroi zorionak, eta gainerakook jarraitu trebakuntza-pilulak egiten, ekainean beste zozketa bat egingo dugu eta!

    Txio-txio ala pio-pio?

    Txoriek txio-txio egiten dute euskaraz, pio-pio gaztelaniaz, tweet ingelesez… Azkenaldian ugaritu egin zaizkigu txoriak UPV/EHUko lantokietan, batez ere txantxangorriak; gero eta gehiago ikusten dira, euskaraz egiteko borondatearen seinale, euskarari hegoak eman nahian, euskara hauspotu nahian; txantxangorria euskaraz egiteko gonbitea da.

    Baina honelakoak ikusita eta irakurrita, txantxangorria mututu egiten da, ez dakielako pio-pio egiten; euskararen aldeko borondatea eta adierazpena keinu eta itxura huts bihurtzen dira, ez da sinesgarria eta indar guztia galtzen du.

    Zer iruditzen zuei?

    Sergio E. (langilea, AZPa)

    Oharra: argazkia benetakoa da, UPV/EHUren campus batean ateratakoa.

    Trebakuntza-pilulekin saria

    Asko dira urte hauetan zehar, UPV/EHUn, euren ahaleginarekin, euskarari bultzada eman dioten langile, irakasle, ikertzaile eta ikasleak.
    Esker ona adierazi nahi genieke atsedenik gabe parte aktibo izan direnei, egunero ale txiki bat jarri dutenei, baita ibilbide honetan zehar hurbildu zaizkigun lagun berriei ere.
    Iazko udazkenean berriro martxan jarri genuen AZPidazki, eta pixkana-pixkana bada ere, ari dira erabiltzaileak parte hartzen. Gero eta gehiago dira tresnan sartu eta “trebakuntza-pilulak” egiteko aukera galtzen ez duten erabiltzaileak, jolasean ohitura hartu dutenak eta parte hartzen dutenak. Zuk ere har dezakezu ohitura hori, eta parte hartu!
    Trebakuntza-pilulak betetzen dituzuenok saritu egin nahi zaituztegu; horregatik, martxoaren 30a arte parte hartzen duzuen EHU/UPVko ikasle, irakasle, ikertzaile eta langileon artean hiru sari zozkatuko ditugu:


    • Emergentziarako bateria (5000 MAH), 16GBko Pendrivea eta UPV/EHUko poltsa.
    Elhuyar hiztegi berriaren ale bat.
    • ZIO bildumako Descartesen hutsegitea liburuaren ale bat eta UPV/EHUko Argitalpen Zerbitzuan argitaratutako Arte zinematografikoa liburuaren ale bat.

    Irabazleen izenak apirilaren 12an jakinaraziko ditugu.

    Trebatu pilulekin eta ZORTE ON!

     

    Arrate Atxa. Euskararen eta Etengabeko Prestakuntzaren arloko errektoreordetzako teknikaria.
    AZPidazki taldearen izenean.