Hizkuntza eta Teknologia: 2. ataleko proiektuak abian

Hizkuntza eta Teknologia, Haur eta Lehen Hezkuntza Graduko 4. mailako Euskara minorreko irakasgaiaren bigarren atal honetan, lan teorikoaz gain, proiektu jakin batzuk garatuko ditugu, banaka edo taldeka.

@Irratigintza

Lehenik, ikasle edo ikasle-talde bakoitzak hautatuko du zein proiekturen markoan egin nahi duen ekarpena eta gero, nork bere proposamena zehaztuko du eta bere lan-egutegia finkatuko du. Honela, ikasleen autonomia landuko da euren interesetatik abiatuta. Nire lana, prozesu honetan, aholkularitzarena da, egingo dituzten ekarpenak argitaratuak izango baitira, euren izenean.

Hauek dira proposatutako proiektu-markoak:

Hautatzeko proiektuak:

• Irratigintza: http://irratigintza.org/

• Liburu Kontalariak eta irakurzaletasunaren sustapena: http://liburukontalariak.blogspot.com.es/

• IKTatuta: emozioak eta IKTak (Mira dentro de TICen euskal bertsioa): Beldurra eta lotsa Haur eta Lehen Hezkuntzan.

• #kulturazientifikoa eta #KZJaia: http://kulturazientifikoa.blogspot.com.es/

• Zinema eta Hezkuntza dokumentala (gehienez 3 lagun)

• Bideojokoen lanketa Lehen Hezkuntzan: PBL proiektua diseinatzea. Ildo narratiboa, pertsonaiak eraikitzea, agertokiak eta mugimenduak.

• Idazmenaren garapena IKTen bitartez: Haur Hezkuntzarako proposamena arbel elektronikoa edota tabletak erabiliz.

• Bestelako proposamenak

Irratigintza proiektua da orain arte ikasle gehien erakarri duena. Proiektu hau zabala da eta datorren ikasturterako, oinarrizko dokumentazioa bildurik izan nahi genuke (laster argituko dut proiektuaren nolakotasuna blog honetan).

Datorren ostegunerako (martxoak 6), lan-taldeak eta proposamenak identifikatuta izango ditugu eta emango dugu prozesuaren berri.

Proiekturen bat interesatzen bazaizu, jarri nirekin harremanetan. Denak proiektu irekiak dira eta edonork har dezake parte!