Non habil, Musa, hain luzaz atzenduz

dunan ahal oro demanan hori,

etorria xahutuz alfer-kantuz,

ilunduz zer txarroi egitez argi?

Itzul, Musa ahanzkor; zuzenean

ordain hain zozo xahutu denbora;

kanta, zale den haren belarrian,

gaitasun baitzain, gai ez ezik, hura.

Jaiki, Musa nagi, beha Maiteri,

Aldik zimurrik marraztu dionetz;

hala bada, jazar Gainbeherari

satiraz denboraren hondamenez.

Bizi-kalte Aldi: hik biziago

fama Maite aihotz makurrak baino.