Ez esan bihotz-huts degizudanik

inoiz etsirik eskas ene gar hau:

neure baitatik hain aise alde nik,

nola gogotik, zurean baitirau.

 

Zure bularpea dut maite-etxe;

bidez joana, laster hona hemen;

epez itzulirik, ez epez atze,

neuk dezadan tatxa neure urez ken.

 

Ez uste izan, ni izanagatik

edozein odoldun bezain jausbera,

txoro orbanduz prest nengokeenik

zaren altxorra huts-truke galtzera;

 

ezen deusez daukat mundu zabala:

zu gabe, arrosa, guztiz hutsala.