Ezin gogo zintzoen ezkontzari

ezbairik onar: ez da amodio

fin, aldaketan bada aldakari,

ukapenak uko baderagio.

 

Ez, bada: nola zenbait seinaletzar,

ekaitzei soraio, zirkinik gabe,

ontzi bidegaldu ororen izar,

hura non, hara behar, zer den ere.

 

Maitasun ez da Aldiren alberdau:

sega makurrak arrosa-musurik

galduagatik, berdin leial dirau;

akaburaino hor doa zuzenik.

 

Oker banago, hor banaiz tronpatu,

inoiz ez dut idatzi ez maitatu.