Mirailak ezin narakuske zahar

zu adin-eder zaren bitartean.

Tarteka, baina, aldi-ildo zakar

bat zugan, eta nago hil ustean.

 

Estaltzen zaituen edertasuna

ez baita ene bihotz-soina baino;

elkarren baita habia kutuna,

adinez ere zer ni zaharrago?

 

Ukan, bada, maite, zeure ardura

nik dudan beste, ez neure, zurea,

bihotz hori zaintzeko, nola haurra

unide xamurrak, gaitzik gabea.

 

Ez harrot, bihotz, enearen galtzez:

zurea neure dut zerorren hitzez.