Oroz gogait, Herio nik atseden;

ikusirik nor dena behar-gorri,

eta deusez hutsa harroputz gailen,

eta Leialtasun zin-hautsi larri,

 

eta urre-ondra laidoztaturik,

eta narraska bertute birjina,

eta Zuzentasun makur-okerrik,

eta ukaldiz elbarri kemena,

 

eta artea Agintek lotua,

eta Zoroko nagusi zuhurren,

eta egia zozotzat hartua,

eta prestua mende gaiztoaren…

 

oroz gogait, ihes bete negike;

ezin utz, ordea, bakarrik Maite.