EKAIA Euskal Herriko Unibertsitateko Zientzi eta Teknologi Aldizkaria


Ekaia

Azken mendeotako aurrerapen zientifikoek eta teknologiaren hedapenak sekulako eragina izan dute gizartean, eta funtsezkoak bilakatu dira guztiontzako. Horretarako ezinbestekoa izan da zientzia eta gizartearen artean dibulgazioaren zubia eraikitzea, ikerketaren emaitzak modu ulergarrian plazaratzea, alegia.

Euskal Herrian zientziaren eta teknikaren dibulgazioak arazo ugari izan ditu, euskara bera ez baitzegoen maila teknikorako egokituta. Zorienez, lan handia egin da azken urteotan, eta gaur egun unibertsitateko gai ugari euskaraz irakasteaz gain, euskaraz diharduten ikerketa-taldeak ere eratu dira. Horrek, areagotu egin du euskarazko dibulgazioaren premia, inguru zientifikoetan sorturiko lexikoak eta indartutako tradizioak ez baitute, tamalez, kalean nahikoa oihartzunik izan. Hedabide desberdinetan gai zientifikoak maiz agertzen dira, baina oraindik hutsune asko geratzen dira.


Euskal Herriko Unibertsitateak zientzia- eta teknika-dibulgazioa bultzatzeko EKAIA aldizkaria sortu zuen 1989. urtean. Lehen saio honen iraupena laburra izan zuen tamalez, eta EKAIAren bidea eten zen, 2. alean, hain zuzen ere. 1995. urtean EHUko irakasle-talde batek, indarberriturik eta hornikuntza hobearekin, inoiz utziriko bideari berrekin zion, bateratasun terminologikoak eta kontzeptu zein aurkikuntza berrien etengabeko agerpenak horrela eskatzen dutelakoan. 1991. urtetik, Ekaia aldizkariak, 31ale arrunt argitaratu ditu eta bost ale berezi. Gaur egun, 39 pertsona osatzen dugu Ekaia aldizkaria eta bertan zientzia arloko aditu asko daude.

EKAIA aldizkarian Natur Zientziak, Osasun Zientziak, Zientzia Zehatzak eta Teknologiari buruzko idazlan originalak argitaratuko dira, goi-mailako dibulgazioaren esparruan.

 

Helburuak:

(i) Zientzia eta teknikaren alorretan egiten diren aurrerapenak euskaraz plazaratzea,

(ii) Unibertsitateko ikasleei zein irakaskuntza ertaineko irakasleei testuliburuen osagarriak izango diren materialak euskaraz eskaintzea,

(iii) Esparru zientifiko-teknikoan euskararen estandarizazioa bultzatzea,

(iv) Esparru honetan hizkuntzaren erabilerak sortzen dituen arazoak konpontzen laguntzea.

  

Ekaia aldizkariak ere, sare sozialetan bere lehenengo urratsa eman du eta twitter kontu bat dauka (@ehu_ekaia). Twitter, informazio gune berria bilakatu da. Bertan, onartzen diren artikuluen berri ematen da, artikuluak bidaltzeko epeak, ale fisikoaren argitarapena...

 


2017: EKAIA Ale berezia. Potentzia-elektronika: teknologia eta aplikazioak


Azala