Adberbio dvandvak

Maila berean dauden bi adberbio elkartzen dira adberbio dvandvak osatzeko: bi erakusle, bi moduzko adberbio edo bi denborazko…

• Han-hemen, han-hor, hala-nola, harat-honat, gaur-biharretan, bihar-etzi(etan), luze-laburrean, goien-barren, ezker-eskuin, atzera-aurrera, goiti-beheiti…

• Adibide klasikoak:
  • Zer doazko haurren bihotz-minak, ama eta alargunen etsimenak? Laster itsaso barne nahasiak goitika han hemen, aurtikitzen ditu iretsi dituen gizonen gorputz hilak. (Atheka gaitzeko oihartzunak, Dasconaguerre, J. B.)
  • Barkha itzaguzu gure bekhatiak, hala nola guk barkhatzen baitugu gure etshaier; ezkizatzula utzi tentatiotan erortera, baina begira gitzazu gaitz oratarik. (Onsa hilceco bidia, Tartas)
  • G: Honi ihes egiteko, zer egin behar da? I: Ützi honen eretze pitzgarriak, eta emazten lagüngoa; nork bere begiak apal edüki, hara hona ohiltü gabe; ez iagoitik beha elhe theyü edo sobera nabasier; iraiz bethi honkite ahalke gabiak; eta ez egon auher behinere. (Catechima laburra, Belapeyre)
• Gaurko adibideak:
  • Aski zenuten talaia nagusian hara-hona ibili eta ziegetako etxe handian pare bat barrualdi egitea hozkia sentitzeko. (Hollywood eta biok, Cillero, J.)
  • Garai hartan, Espainiako Poliziak ustez Madrilgo atentatuekin zerikusia zuten hainbat pertsona atxilotu zuen han-hemen. (Hizlandia, Iñigo Aranbarri)
  • Beste batzuek aldiz, egiazko bakartiarrak, lagun asko dituztela sinestarazi nahiz, dei faltsuak pasatzen dituzte, edo hobeki erranez norbait deitzen balute bezala egiten dute: hala nola arratsalde osoak pasatzen dituzten edozein ostatuko terrazan, beti deika. (Skyroom, Etxeberri, R.)

Adjektibo dvandavak ere erator litezke: luze-zabaleko (programazioa), leku-denborazko atzizkiak, ikus-entzunezko (ikasmateriala)…

• Besteak hamabost-hogei zentimetroko luze-zabaleko plaka angeluzuzenak ziren, karratuago batzuk, laukizuzenago besteak. (Kuskue tanden, Iñaki Iñurrieta)
• Baina mundua biribila da, eta jira-bira etengabean dihardu gainera: 1994an, Euskal Herriko Unibertsitatean hasi nintzen irakasle, eta hantxe dihardut oraindik ere, ikus-entzunezko komunikazio eta publizitate kontuak irakasten. (Kurrin-kurrun vitae, Garzia, Joxerra)

Bigarren osagaiak -ka atzizki adberbio-sortzailea daramala ere bai: laztan-musuka, irri-barreka, izkuta-agirika, negar-zotinka…

• O! zer pozakin laztan-musuka
  
• Zaitun artuko besora! ( Ama baten otsa seaskaren ondoan, Revista Bascongada)
• Eta isilune baten ondoren, negar zotinka hasi zitzaidan. (Behi eroak, Patxi Iturritegi)