Erabiltzaile Tresnak


morf:5:20:7:2:3:3:2:2

-tu artean

-tu artean menderatzaileak ere iraupenaren tarte osoa adierazten du eta aditzoinarekin nahiz partizipioarekin erabil daiteke. arte postposizio hutsa ere har dezake aditzondoan.

  • Lana amaitu artean ez zioten elkarri hitzik egin.
  • Gaua etorri artean hamabi aldiz egin zuten tiro, eta bertze hainbertzetan huts gure murruei. (Mailuaren odola, Epaltza A.)

Adibidetegia

  • Adibide klasikoak:
    • Etsaien tentu oriek aienatzeko indarrak atera ditezke Komunioneko maietik, adiuntz edo garai onean mai orretaratzera komuniatzen diran animak; baña aratzen ezpadira etikan sartu artean, edo alferkeriz beren buruak galdu arteraño, izurri galgarria ta eriotz gaistoa izain da anima beren komunioneko jatea. (Jesusen amore-nequeei, Mendiburu, S.)
    • Iakiteko duzu nahi baduzu muillatu Getharian eta baldin baduzu haizea, bendebala ez hurbil sobera Santantongo irlariharik eta hiriaren punta deskubritu artean eta izaren tzare orduan irlaren trebesean zeiña orduban sarthuko baitzare barnat. (Itxasoko nabigazionekoa, Etxeberri, P.)
    • Goraxko harturik airea, ezin bururatu zuen, eta kolpe bat edan, laguna berriz itzuli artean. (Piarres, Barbier)
  • Gaurko adibideak:
    • Itsas gizon zaharrarena egitera sartua nintzen, eta gaua amaitu artean jarraituko nukeen neure istorioak ehuntzen. (Brooklyngo erokeriak, Paul Auster / Arana, O.)
    • Gero Cristinaren istripuarena gertatu zen, eta Marga eta biok munduko adiskiderik minenak bihurtu ginen batxilergoa amaitu artean. (Itzalak, Zaldua I.)
    • Gaua etorri artean hamabi aldiz egin zuten tiro, eta bertze hainbertzetan huts gure murruei. (Mailuaren odola, Epaltza A.)
    • Ni agorara joango naiz, atzerritar bat gonbidatzera; ontzian ekarri dut, eta Pireoren etxera bidali, ni hona etorri artean. (Ulises, Homero / Igerabide, J. K.)

Muga markatzen ahal du artean horrek (hemen egongo gara zuek etorri artean), baina holakoetan badirudi maizago erabiltzen dugula gaur egun arte (zuek etorri arte).

lanaren aipamena nola egin...

Euskara Institutua, EHU, "-tu artean", Sareko Euskal Gramatika (SEG), www.ehu.eus/seg
ISBN: 978-84-693-9891-3