Erabiltzaile Tresnak


morf:5:20:7:3:4:4

bi urte dira

Badira beste esapide batzuk gertakaria zenbat denbora lehenago gauzatu den markatzen dutenak:

  • Bi urte dira etxetik atera zirela.
  • Ez, ez, gerora sinistu nai det bizitz obea badala! VIII Ama gaxoa nere galdezka mundutik zeru garbira azken-laztana nik eman gabe igo zala bi urte dira. (Nere bidean, Arrese, E.)
  • Ez ordia Franziskoren semiai esan gabe: “Begira: bi urte dira nik mendi au eman nizutela; berriz ere zerbait palta dezutenian, ementxen nago gusto guziarekin laguntzeko”. (Asis-co loria, Beovide)
  • 'Bi urte dira Quitoko unibertsitateko jendearekin ari naizela. (Lagun izoztua, Sarrionandia, J.)
  • Bi urte dira gosetea lurralde osoan hasi zela eta datozen bost urteetan ere ez da hazirik ereingo ez uztarik bilduko. (Agindutako lurraren bila I, Mujika, J. A.)

Ikusten denez, holakoek perpausean –la menderagailua eskatzen dute. Ohart gaitezen komunztaduran:

  • Urte bat da (edo izango da, egingo du) etxetik atera dela.
  • Bi urte dira (edo izango dira, egingo ditu) etxetik atera dela.

Beste itzuli hau ere badago:

  • Badu urte bat etxetik atera dela.
  • Badu bi urte etxetik atera dela.
  • Badu urte bat Kattalinek erretzeari utzi ziola eta geroztik nekez jasaiten du tabakoaren usaina. (Anbroxio, Bidegain, E.)
  • Badu urte andana, Espainiako gure haurridek amestu zutela han idekitzea, euskaldun gazteriarentzat ikastetxe nagusi bat, nun argi beren semeak, hamazapi, hemezortzi urtetarik harat. (De re publica edo politikaz, Xarriton, P.)
  • Eleak erriak gaizkatuko digun aitzakia ez da gaurkoa, badu urte-multzo bat, belarriak ordean daude sor eta gor, entzun nai ez dutela. (Kazetari lanak, "Gurbindo")

lanaren aipamena nola egin...

Euskara Institutua, EHU, "bi urte dira", Sareko Euskal Gramatika (SEG), www.ehu.eus/seg
ISBN: 978-84-693-9891-3