Etorkizunera begiratzen dutenak

Badira esamolde batzuk denboraren aurrera joana adierazten dutenak, ondokotasuna. Holakoak dira hemendik lau astetara, gaurtik bi egunera, handik bi ordura, handik laugarren astean, sei egun barru, bihartik hamar egunera, bost egunen buruan eta horien gisakoak:

• Handiki haiek goiz batean jin, eta bertze goiz batean joan ziren, handik hiru egunetarat. (Lur bat haratago, Irigoien, J. M.)
• Iritzi horiek, haatik, zalantzan jarri ziren handik hogei urtera gabe. (Antropologo bat Marten, Oliver Sacks / Olarra, X.)
• Gaurtik hurrengo 28 egunotan, haritzaren eta artearen hilabetean gabiltzake. (Naturaren mintzoa, Zabala, P.)
• Bere amak hirira ekarriko du hiru egun barru;[…] (Harreman arriskutsuak, Choderlos de L. / Jon Muñoz)
• Hamabost egunen buruan, hortxe nonbait izango zara zaldian ibiltzeko moduan, baina orain ez. (Artur erregearen heriotza, Igerabide, J. K.)

Horiek guztiek etorkizuneko epearen muga seinalatzen dute, eta kokapenezkoak izan daitezke (Handik bost egunera sendatu zen) edo epearen barneko denbora ere seinala dezakete (Handik bost egunera hiru aldiz erori zen).

Gaur zortzi bezalakoek, berriz, aurrekotasuna adieraz dezakete (Gaur zortzi etorri zen), baina ondokotasuna ere bai:

• Liz eta Sara eskolako zuzendariaren senarrarekin geratuko dira Santa Barbaran, eta Josebak gaur zortzi egingo du bere irakurketa liburutegian Book Clubeko kideentzat (Soinujolearen semea, Atxaga)
• Joko ona erakutsi digute eta momentu onean, ezen igandean zortzi izanen dute derbia Avironeko Baioneskein. (Angelu, Herrietako kronikak: Lapurdi, Herria)