Metodologia

Masterra ikasturte akademiko batean egiteko da (60 kreditu dauzka). Irakaskuntza aldia hiru hiruhilekotan egituratua dago eta denbora horretan ikasleek 48 kreditu egin behar dituzte, gutxienez. Gainerako 12 kredituak master amaierako proiektuarenak dira. Ikasleek proiektua egin dezakete irakaskuntza aldian eta gero; aurkeztu, betiere, ikasturtea amaitutakoan egiten da. Masterrak derrigorrezko irakasgaien multzo bat dauka eta irakasgai horiek lehenbiziko sei asteetan emango dituzte unibertsitate guztietan. Helburua da ikasleek makroekonomia, mikroekonomia eta ekonometria arloetan dauzkaten oinarrizko jakintzak parekatzea. Lehen hiruhilekoan geratzen den denboran eta hurrengo bi hiruhilekoetan hautazko irakasgaiak emango dira, ikastegi bakar batean, eta ikasleek 36 kreditu aukeratu behar dituzte. Hiru unibertsitateek eskaintzen dituzten irakasgaiak bateragarriak direla aprobetxatzeko, ikasleek gutxienez hiru kreditu egin behar dituzte haien unibertsitateaz aparteko beste bi unibertsitateetan. Hautazko irakasgaiei dagokienez, lehentasun profesionalen arabera aukera errazago egiteko, sei ibilbide akademiko daude: industria ekonomia, jokoen teoria eta ingurumen ekonomia, politiken ebaluazioa, laneko ekonomia, Europar Batasuneko politika ekonomikoak eta ekonomiako teknika kuantitatiboak.

Ebaluazioa

Irakasgaiak ebaluatzeko normalean baliatuko dira, batetik, ebaluazio jarraitua; eta bestetik, azkeneko idatzizko proba edo lana. Ebaluazio jarraituari dagokionez, ikasleek astero edo hamabostero ariketak egin beharko dituzte; eta azkeneko probari dagokionez, irakasgaiko programan dauden gaiei buruzko ariketa praktiko edota teorikoak ebatzi beharko dituzte.Ikasleek, ikasketa aldia amaitutakoan, honako hauek egiteko gai izan behar dute:- Analisi ekonomikoan goi mailako kualifikazioa duten langileak behar dituzten lantoki pribatu eta publikoetan lan egitea. - Analisi teoriko eta kuantitatiboak egiteko tresna sofistikatuak abileziaz erabiltzea arlo hauetan: industri antolakuntzan, lan merkatuan, garraioaren ekonomian, Europako ekonomian, politika publikoen ebaluazioan eta ingurumenaren eta baliabide naturalen ekonomian. - Profesional eta ikertzaile gisa informazio eta komunikazio teknologiak erabiltzea, analisi ekonomikoaren alorrean. - Politika publikoak ebaluatzen eta enpresa estrategiak antolatzen dituzten diziplina anitzeko lan taldeetan parte hartzea edo zuzendari gisa aritzea. - Nork bere kasa ikastea eta jakintza eta teknika aurreratu eta espezializatu berriak garatzea, ikerketak akademi zorroztasunez egiteko.