Aurreko urteetan bezala, Gipuzkoako Campuseko Bibliotekako Arkitektura Atalak hilero hautaketa bat egin du bere bildumara gehitu diren lanen artetik. Pandemia dela-eta eta Bibliotekako aurrez-aurreko jarduerak nahitaez uzteagatik izan ditugun zailtasunak gorabehera, eskuratze, katalogatze eta sailkatze prozesuak ohiko moduan egin dira, eta obrak jasotzeko garaian izandako atzerapenen bat baino ezin da aipatu.

2020an aukeratutako liburuek gai asko islatzen dituzte, ohikoa den bezala: arkitektura, diseinua eta gizartea Aro Modernoaren hasieran; “espazioaren konkistarekin” lotutako diseinuari buruzko gida bitxia, “Moon, architectural guide”;  Beatriz Colominaren “X-Ray Architecture” monografia aproposa; izan ere, esan bezala, Beatriz aurreratu egin zen eta lehenengo kontatu zuen (osasun-krisi handiek arkitektura eraldatzen dute); Manuel Sayrachen Bartzelonako obra modernista ezezagunaren balioa azpimarratzea; Iñaki Bergeraren ikerketa, Lucien Hervéren argazkigintza eta arkitekturaren arteko erlazioari buruzkoa.

Honako hauek ere aukeratu dira: zooen diseinuari eta eraikuntzari buruzko eskuliburu bat, DOMek argitaratzen duen bilduma ezagunekoa; “Del pisito a la burbuja inmobiliaria” izeneko liburu interesgarri bat, jabetzako etxebizitzaren herentzia kultural falangista aztertzen duena; “World film locations” bilduman Madrili eskainitako alea, hiriaren eta zinemaren arteko harremana aztertzen duen bilduma, eta hainbat pelikulatan hiriguneak paper garrantzitsua betetzen duela gogorarazten diguna. Era berean, beste bi obra hiri-garapenari buruzkoak dira: bata, “The obstinate construction of San Francisco ” izenekoa, eta, bestea, Medellingo hiri eta gizarte sarean izandako aldaketa sakonei buruzkoa.

Hautaketa hori osatzeko, EHUko Arkitektura Eskolarekin lotutako bi obra ditugu. Alde batetik, ikasleen ikuspuntuen bilketa Sagues eremua birpentsatu eta berregiteko, eta, bestetik, Bordeleko Eskolako “Transfrontière” irakasgaiaren eta beste ikasketa amaierako proiektu batzuen ekarpenak, eremu beraren gainean, hiriaren bazterretako bat. Saguesi buruzko hiri proiektuen bilduma hori sarbide irekian ere kontsulta daiteke, modu digitalean.

Azkenik, Ramón Ayerza Elizarain irakaslearen “Iglesias de madera en Gipuzkoa” lana ere aukeratu da. Azterlan bikaina da arau geometriko zorrotzek zehaztutako konposizio-formula komunei jarraitzen dieten eraikuntza horiei buruz. Arau horiek agerian uzten dute haien arteko ahaidetza kultural, estetiko eta ia emozionala ere bai. Arkitektura Atalaren iritziz, Ramonen liburu hau “urteko liburutzat” hartu behar da 2020. urtean bere funtsetan sartu direnen artean, bai egindako azterlanaren interesagatik, bai material grafikoagatik.

Hautatutako hamabi lanek osatzen dute "TOP 2020 arkitektura" erakusketa, eta hau 2021eko urtarrilaren bukaera arte kontsulta daiteke Liburutegiko Ikaskuntza Aretoan. Horrela, Arkitektura Atalak erakusketak antolatuko ditu berriro bere funts bibliografikoak ezagutarazi edo zabaltzeko. Lan hori martxoan eten egin behar izan zen, pandemia zela eta.