Bilaketa aurreratua

Ogi apurrak

Egungo Euskararen Hiztegia (EEH)

zirriborratu, zirriborra(tu), zirriborratzen (orobat zirriborrotu g.er.) 1 du ad zirriborroa egin. ik zirrimarratu.

Eta "zirriborratu ziola" esan dudanean, adierazi nahi dut ikuspen hori zirriborraturik dagoela eta erdietsezina dela bere izaeragatik beragatik.  Xabier Kintana   «Alderraien gidaria» - Mose ben Maimon, 2006 - 67. orr.

Paperean hasi nintzen bospasei ideia zirriborratzen.  Xabier Mendiguren Elizegi   «16 ipuin amodiozko», 2002 - 145. orr.

Emakumeak poltsatik bolaluma eta libreta ñimiño bat atera eta zerbait zirriborratu zuen gainean.  Aingeru Epaltza   «Rock'n'roll», 2000 - 390. orr.

Ohar batzuk zirriborratu ditiat...     «Kuskue tanden», 2004 - 28. orr.

Kapa jantzi ondoren, Harryk ohar bat zirriborratu zuen Ronentzat, nora joan zen esanez.  Iñaki Mendiguren   «Harry Potter eta sekretuen ganbera» - J.K. Rowling, 2001 - 92. orr.

Hego haizeak gure literaturan duen presentziaz lantxo bat zirriborratzen hasia nengoen.  Joxean Agirre   «Romain zen bere izena», 2003 - 129. orr.

-Lan bikaina egin duzu -esan zion, helbidea esku dardaratiz zirriborratu ostean-, eskerrik beroenak eman behar dizkizut.  Migel Angel Mintegi   «Denak du bere prezioa», 2002 - 95. orr.

Arroz ura edan behar duzu batez ere -beste paper bat zirriborratu zion Mentxuk-.  Josu Landa   «Odolbildua», 2002 - 66. orr.

"Zer esan nahi duzu?”, zirriborratu zuen Harryk, zirrararen zirraraz orrialdea orbanduz.  Iñaki Mendiguren   «Harry Potter eta sekretuen ganbera» - J.K. Rowling, 2001 - 203. orr.

Zoruan hormarako paper zaharrak zabaltzen zituen, buelta emanda, eta paperaren gainean muinoak eta ibaiak zirriborratzen zituen.  Iban Zaldua   «Itzalak», 2004 - 92. orr.

Han daude bolaluma beltzez zirriborratutako marrazkiak.  Iban Zaldua   «Itzalak», 2004 - 90. orr.

Berehala zirriborrotzen du egintzaren plangintza eta erakuntza, gero bakoitzak bete beharko duena.  Joan Mari Lekuona   «Mistika liburuak» - Eckhart-Tauler, 1997 - 87. orr.

Ikusiko da ondoan zirriborratuko dudan teoriak harreman bikoitza duela orain arte egin diren ikerketekin.  Xabier Arregi   «Jakitearen arkeologia» - Michel Foucault, 2003 - 22. orr.

Maila enuntziatiboa bere gertutasunean bertan zirriborratzen da.  Xabier Arregi   «Jakitearen arkeologia» - Michel Foucault, 2003 - 128. orr.

Hipotesi orokor bat zirriborratzen saiatzen da.  Iban Zaldua   «Itzalak», 2004 - 74. orr.

Puntu honetantxe hasten da zirriborratzen gero zinemari buruz berehalaxe zabalduko den kritika-gai bat.  Josu Zabaleta   «Irudia» - Jacques Aumont, 2004 - 171. orr.

Saltzaile ibiltariarentzako beste gutun bat zirriborratzen hasi zen buruan, gutun gogorra, iraingarria.  Bego Montorio   «Napomuceno da Silva Araujo jaunaren testamentua» - Germano Almeida, 2003 - 57. orr.

Ikuskizun genuela etortzekoak ziren urrats berriak; hauteman zitekeela garai berrien nondik norakoa, baina bidea zirriborratu gabe zegoela artean.  Berria - Euskal Herria   2006-05-04

Zortzi ataletan banatua; atal horien sarrerak idatzita, osorik batzuetan, zirriborratuta besteetan; eta ia dena makinaz idatzita.  Berria - Kultura   2004-12-02

2 irud/hed

Aski patetikoa zeritzon aurpegian zirriborratutako segurtasun keinuari.  Josu Landa   «Odolbildua», 2002 - 57. orr.

Beraren aurpegi fin, ttikian irri liluragarria zirriborratu da.  Gotzon Garate   «India harrigarria», 2001 - 132. orr.

Disimuluan huts egindako gaitz-ulertuaren imintzioa zirriborratu zitzaion Joseluri opariaren zertzeladak ikusi zituenean.  Josu Landa   «Odolbildua», 2002 - 131. orr.

Bainugelako ispiluak bere gorputza zirriborratuta erakutsi zion Danielari.  Jasone Osoro   «Korapiloak», 2001 - 99. orr.

Argi gorri indarge batek erditzalez zirriborratzen zuen begietara hedatu zitzaion esparru ezezaguna, eta instintiboki makurtu zuen linternaren norabidea lurrera.  Josu Landa   «Odolbildua», 2002 - 104. orr.

Nire pentsamenduaren nahasmendu izugarriari diot beldur, batez ere, nire arrazoiari, ihes egiten baitit, estura larri misteriozko, ikusezin batek zirriborraturik, barreiaturik.  Josu Zabaleta   «Fantasiazko ipuinak» - Guy de Maupassant, 2000 - 175. orr.

Orain egiazko balioaren irizpiderik ez dugu, denak berdin balio du, erlatibismo zirriborrotsuenean zirriborratuak gabiltza.  Joxe Azurmendi   «Euskal Herria krisian», 1999 - 130. orr.

3 (era burutua izenondo gisa)

Bederatzi-hamar lerro zirriborratuk bete nahi zuten orria.  Juan Garzia   «Ipuin hautatuak» - Jorge Luis Borges, 1998 - 147. orr.

Orri zirriborratuak bota; te-kikara sakelan sartu patioko kanilan garbitzeko.     «Loroaren teorema» - Denis Guedj, 2006 - 257. orr.

Etxeko jantzia janzteko jaka eranzterakoan, sakelak miatu, ohi zuen bezala, eta hara paper zirriborratua aurkitu.     «Loroaren teorema» - Denis Guedj, 2006 - 385. orr.

4 tintaz borratu.

Pixka batera, idatzi zuena zirriborratu eta begiak jaso zituen, leihotik kanpora aurrera zihoan udaberrian erreparatu gabe, pentsakor.  Joxemari Urteaga   «Ordaina zor nizun», 2001 - 193. orr.

hitz multzoen maiztasunak (gutxienez 3 aldiz agertzen direnak)

ohar bat zirriborratu (3); orri zirriborratu (3); zerbait zirriborratu (3)

 



Nodoa: liferay1.lgp.ehu.eus