Ostegun honetan hasiko da aurtengo Filosofia Mintegi Irekia. Lehenengo hitzaldia Josu Acostak (ILCLI) emango digu, "Kultura esplikatzen: Constraint-etan oinarritutako hurbilpena" izenburuarekin--behean duzue  hitzaldiaren abstract-a. Saioa, ordubatetan, Hezkuntza, Filosofia eta Antropologia Fakultateko Batzar Aretoan, euskaraz.

Josu Acosta Calvo (ILCLI) 

Kultura esplikatzen: Constraint-etan oinarritutako hurbilpena

Hitzaldi honetan “constraintetan oinarritutako kulturaren hurbilpena” aurkeztuko dut, gaur egungo kulturaren teoria naturalista nagusiekin alderatuz: hots, azalpen epidemiologikoak (Sperber 1996; Atran 1990, 2002; Sperber eta Claidière 2006), Memeen azalpenak (Dawkins 2006 [1976], Dennett 1996) eta Eboluzio Teoria Estandarrak (Boyd eta Richerson 1988 [1985], Mesoudi 2011). Teoria hauek kultur edukiak errepresentazio-item batzuekin identifikatzen dituzte –errepresentazioekin, memeekin edo kultur bereizgarriekin. Hau dela eta “Kulturaren Ikuspegi Itemikoa” izenpean identifikatu ditut. Baina hori ez da nahikoa, nire ustez. Ikuspegi itemikoak berak inplizitu diren hainbat edukiren edo elementuren premia dauka, baina ez du haientzat esplikaziorik. Constraintetan oinarritutako hurbilpena honela har daiteke: kulturan inplizitu doanaren azalpena da. Horretarako, Situazioen Teoriatik datozen nozioak ekarri ditut eta, zehatzago, constraint nozioa. Nozio honek eta honen harira hurbilpenean garatutako attunement nozioak kulturaren oinarri inplizituak esplikatzeko bidea emango digute (Barwise eta Perry 1981, 1999 [1983]; Barwise 1989; Israel eta Perry 1990, 1991).