Deskribapena

Jai-giroan hasiko da aurten 'Emakumeak Zientzian', ekimenari atxikitako erakunde eta ikerketa-zentroetan lan egiten duten emakumezko zientzialari eta teknologoak omenduz. Ekitaldi berean, eta berritasun gisa, Emakumeak Zientzian himnoa aurkeztuko da.

Honela, asteazkenean, otsailaren 8an, 18:00etan, Intxaurrondo Kultur Etxean, Donostian, hiru ikertzailerekin —Ana Beloqui (POLYMAT), Marta Pascual (BC3) eta Marina Kalashnikova (BCBL)- eta Alaia Martin Etxebeste bertsolariarekin solasaldia egingo da Mari Luz Guenagak, Deusto LearningLab-eko arduraduna eta Emakumeak Zientzian egitasmoko koordinazio-taldeko kidea, gidatuta.

Jarraian, Jon Gurrutxaga, Gipuzkoako Foru Aldundiko berrikuntza eta nazioarteko zuzendaria, Izaskun Artetxe, Bizkaiko Foru Aldundiko ekonomia sustapen saileko idazkaritza tekniko ekonomikoa eta Ainhoa Aldasoro, Donostia Sustapenako berrikuntza eta lehiakortasuneko arduradunarekin solasaldia Idoia Mugikak, Materialen Fisika Zentroko komunikazio- eta dibulgazio-arduraduna (CFM, CSIC-UPV/EHU) eta Emakumeak Zientzian egitasmoko koordinazio-taldeko kideak, gidatuta.

Emakumeak Zientzian himnoaren aurkezpena egingo da ere zuzenean Janus Lester-en eskutik.

Hogeita lau euskal erakundek, horien artean Euskal Herriko Unibertsitatea, elkarrekin antolatu dute Emakumeak Zientzian ekimenaren 7. edizioa, eta 50 jarduera baino gehiago izango dituen programa zabal bat diseinatu dute Bizkaia eta Gipuzkoarako, era askotako publikoarentzako, “zientzia bada nesken kontua” mezua gizarte osora irits dadin.