euskaraespañol

Gaurko irudia

UPV/EHUk 460,3 miloi euroko aurrekontuaren aurreproiektua aurkeztu du

Aurreproiektua Gobernu Kontseiluan aurkeztu da gaur, eta 2021ekoa baino %5,24 handiagoa da

  • Albisteak

Lehenengo argitaratze data: 2022/02/03

Irudia

UPV/EHUko Gobernu Kontseiluaren gaurko bileran, errektorego taldeak unibertsitate publikoaren 2022ko ekitaldirako aurrekontuaren aurreproiektuaren zifra handiak aurkeztu ditu: 460,3 miloi euro.

Iazko ekitaldian, Euskal Herriko Unibertsitateak 437,37 milioi euroko aurrekontua izan zuen. Horrenbestez, oraingo ekitaldirako aurkeztutako aurreproiektuaren zenbatekoa %5,24 handitu da aurreko ekitaldikoarekin alderatuta.

Dokumentua Gobernuaren Kontseiluan aurkeztu ondoren, organo horretako kideek zuzenketak aurkeztu ahal izango dituzte martxoaren 17tik 25era bitartean. Ondoren, dokumentua Gobernu Kontseiluari helaraziko zaio berriro, hil horretako 31n onar dezan. Onartuz gero, UPV/EHUren Gizarte Kontseiluari bidaliko zaio, eta han, hala iritziz gero, behin betiko onartuko da.

Honoris causa doktorea izendatzea

Susan Jocelyn Bell Burnell irakasle eta ikertzaileari honoris causa doktore titulua ematea ere erabaki du gaur Euskal Herriko Unibertsitateko Gobernu Kontseiluak. Ekimena Zientzia eta Teknologia Fakultateak bultzatu du, Fakultateko Batzarrak 2019ko urriaren 16an hartutako erabakia dela eta. Erabaki horretan, proposatutako irakaslearen bikaintasun akademikoa jaso zen. Jocelyn Bell Burnell doktoreak irrati maiztasunen espektroko lehen anomalia astrofisikoa identifikatu zuen, eta, horrek pulsarrak aurkitzea ekarri zuen. Aurkikuntza hori gertatu zen doktorego ikasketak egiten ari zenean Cambridgeko Unibertsitatean, eta aparteko eragina izan zuen bai grabitazioaren fisikan bai ondoren grabitazio uhinen detekzioan.