Gutxi batzuek egin zuten kale. Eta bertan, pertsonalki, egon ezin zirenek bideoaren bidez edo inoren ordezkaritzaz agertu nahi izan zuten. Agindua arraz zaila eta konplexua zen, omenaldi honen berri ezkutuan azken unera arte mantentzea. Egiazko erronka.

Irantzu Epelde Zendoiak eta Oroitz Jauregi Nazabalek hartu zuten proiektuaren lema, Universidad del País Vasco/Euskal Herriko Unibertsitatearen Argitalpen Zerbitzuak argitaratu duen omenaldi liburu bihurtu den proiektua, Letren Fakultateko Areto Nagusian egindako ekitaldian omenduari aurkeztu eta bere eskuetan jarri zena.

‘Bihotz ahots’ liburuan 30 idazlan bildu dira, Lourdes Oñederra irakaslearen erretiroarengatik osatu den lan kolektibo honetan parte hartu nahi izan duten lankide akademikoek idatzita. Aurkezpenean, Oroitz Jauregi liburuaz eta omenduaz mintzatu zen hitz hauek baliatuta: “Irakasle izan zarelako, liburuan parte hartzen duten guztien, edo ia guztien, irakasle, irakasle letra larriz ulertuta. Irakastea atsegin izan duzu, ikasleekin buruz buruko harremana izatea eta ikasleekin elkartrukea izatea. Zure klaseetatik pasa garenok bizi izan dugu sentsazio hori, gutxiago edo gehiago, hala bizi izan dugu.”

Mahai burutzan aritu ziren guztiek, Iván Igartua Arabako campuseko errektoreordeak, Ricardo Gómez saileko lankideak, Miren Azkaratek, Maite Echeniquek eta Bernhard Hurch-ek laudatu zituzten omenduaren ibilbide distiratsua eta esku hartu dueneko arlo ezberdinetan egindako lana, bai irakasle nola idazle.

Ibilbidea

Fonologiako katedraduna Euskal Herriko Unibertsitatean eta Euskaltzaindiako kide oso, Lourdes Oñederra Deustuko unibertsitatean lizentziatu zen Filologia Hispanikoan, hizkuntzalaritza master bat egin zuen Iowako unibertsitatean eta doktore izendatu zuten UPV/EHUn Euskal Filologian, Koldo Mitxelena zuzendari zuela.

Bere irakaskuntzan eta ikerkuntzan fonologia teorikoa eta euskararen fonologia izan dira aztergai eta langai eta eskolak eman ditu San Carloseko unibertsitatean (Guatemala), Karl Franzens Universität (Graz, Austria) eta Chicagoko unibertsitatean (AEB). Argitalpenen artean nabarmentzekoak dira ‘Euskal fonologia. Palatizazioa, asimilizazioa eta hots sinbolismoa’ (1990) eta ‘Fonetika Fonologia hitzez hitz’ (2004).

Lankide jardun da egunkari eta aldizkarietan eta zenbait ipuin argitaratu ditu euskaraz (‘Anderson anderearen gutizia’ gaztelaniaz, ingelesez eta errusieraz argitaratu da). Honez gain, ‘Eta emakumeari sugeak esan zion' eleberriak, gaztelaniaz, ingelesez, errusieraz eta italieraz itzuli denak, 2000ko Literaturako Euskadi saria, 2000ko Zilarrezko Euskadi saria, 1999ko Kritika saria eta 1999ko Beterriko liburuaren saria jaso zituen. 2013an  ‘Intemperies (babes bila)’ bigarren eleberria kaleratu zuen.