Deskribapena

Ostirala, abenduaren 15ean, 12:00etan, UPV/EHUko Hezkuntza, Filosofia eta Antropologia Fakultateko areto nagusian, Donostian, ‘Oihenart’ Aforismoen VII. Lehiaketaren sari banaketa ospatuko da, aipatutako ikastegiaren festaren baitan. Aurtengo edizioaren lehen saria ex aequo Juan Ramon Alberdik aurkeztutako ‘Kristalinoaren koloretik’ lanak jaso du eta Ekaiz Goikoetxeak jaso du ere, ‘Eman zu bizitzari‘ lanagatik. Sariak banatuko dituzte J. Inazio Marko Juanikorena fakultateko dekanoak eta Edurne Otamendi Garmendia Donostiako Udalaren Euskara Zerbitzu buruak.

Lehiaketara aurkeztu diren lanak edizio honetan epaitu dituzte: Cristina Lasak (fakultateko irakaslea), Juan Kruz Igerabidek (idazlea), Eider Rodriguezek (fakultateko irakaslea), Antonio Casado (Gipuzkoako Campuseko Unibertsitate Hedakuntzako zuzendaria) idazkari moduan aritu delarik.

UPV/EHUko Hezkuntza, Filosofia eta Antropologia Fakultateak, Donostiako Udaleko Euskara Zerbitzuaren laguntzaz, ‘Oihenart’ izeneko aforismoen lehenengo lehiaketa abian jarri zuen 2010.ean. Lehiaketa honen helburua “pentsamendua eta euskarazko pentsamendua bultzatzea, idazteko ohitura sustatzea eta saiogileak sortzea da. Aforismoak modu laburraz azaldutako pentsaerak lirateke, alegia ideiak agerrarazteko aski den testua, osoa, baina motza. Literaturan badira aforismoen adibide nabarmenak: kontakizun laburrak, herri-ipuin motzak, esaera zaharrak… Aurten lehenengo saria ex aequo ematea erabaki du epaimahaiak eta irabazle bakoitzak 500 euroko saria jasoko du. Euskarazko sorkuntza eta gogoeta sustatzeko baliagarria da lehiaketa hau, aforismoak sortu berriak izan behar baitute. Aforismoa oso literatura genero egokia da, era berean, saiakerak idazten hasteko”.