euskaraespañol

Gaurko irudia

Henrike Knörr beken banaketa, Araban euskararen erabilera ikertzeko

  • Albisteak

Lehenengo argitaratze data: 2022/02/02

Irudia
Arabako Foru Aldundiak eta UPV/EHUk Henrike Knörr lehen bi bekak banatu dituzte. Argazkia: AFA.

Arabako Foru Aldundiak eta Universidad del País Vasco/Euskal Herriko Unibertsitateak Henrike Knörr lehen bi bekak banatu dituzte, Araban euskararen erabilera aztertzea helburu duten ikerlanak bultzatzeko. Lehenengo edizio honetan, Mikel Perez eta Iker Ondartzarentzat izango dira bekak, eta Arabako euskalkia ikastera eta Gasteizko gazte elebidunen hizkuntzen erabilerara bideratuko dute foru-laguntza.

Foru erakundeak hainbat urte daramatza euskal hiztunak eta euskal hiztunen sareak aktibatzen eta Lurraldean euskaraz bizitzeko aukerak bermatzeko baldintzak sortzen laguntzen duten politikak ezartzen. Helburu hori lortzeko, funtsezkoa da prozesuari berari buruzko ikerketa bultzatzea, eta, horregatik, UPV/EHUrekin lankidetzan aritzea erabaki du, euskararen erabilerari buruzko ikerketa-lan monografikoak eta master amaierako eta gradu amaierako lanen proiektuak sustatzeko deialdia urtero argitaratzeko.

Deialdi honetan master amaierako proiektuak lehenetsi dira, baina baita ikerketako edo gradu amaierako proiektu monografikoak ere, ondorengo tesiak bultzatzeko helburuarekin, betiere ikergai nagusia euskararen erabilera bada, edozein jakintza-arlotatik aztertuta. Edonola ere, unibertsitateko irakasle doktore batek proiektua bermatu beharko du.

Lehen aintzatespena Mikel Perez Gonzalezen proiektuarentzat izan da, Vitoria-Gasteizko gazte elebidunen artean kodeak txandakatzearen aurrean jarrerak eta onargarritasuna izenburupean. Azterlanaren helburua da gazte elebidunen profil soziolinguistikoa aztertzea, Gasteizko euskara-gaztelania testuinguru oztopatzailean, eta kodearen alternantziari buruz dituzten iritziak eta jarrerak identifikatzea.

Horrekin batera, fenomeno horren onargarritasuna ere ezagutu nahi du proiektuak. Horretarako, ikerketa enpiriko bat egingo da, eta, bertan, batetik, kode-alternantziaren erabilera eta jarrerak ikertzeko galdetegi bat emango zaie parte-hartzaileei, eta, bestetik, onargarritasun-ariketa bat egingo zaie, txandakako esaldiekin. Jarraian, galdesortaren emaitzak eta onargarritasun-ariketa alderatuko dira, Gasteizko gazte elebidunen profilaren, kode-alternantziarekiko duten jarreraren eta txandakako esaldiekiko onargarritasunaren arteko erlazioa ezagutzeko.

Bigarren saria Iker Ondartza Padiernak irabazi du, arabar euskalkian sakontzen egindako lanagatik. Lan honen bidez, euskalkia definitzen jarraitu nahi da, azken urteotan egindako hainbat lanen bidez: batetik, euskalkia mugatuko duten ezaugarri linguistikoak ezartzea eta horretan sakontzen jarraitzea.

Bestetik, definizio linguistiko horretatik abiatuta, arabarraren hedaduraren irudi bat marraztu ahal izatea, bai geografikoki, bai kronologikoki. Geografikoki, ez da euskalkiaren kanpoko muga edo hedadura osoa kokatu nahi den bakarra, baizik eta barne ezberdintasunak eta balizko zatiketak azaleratzea ere. Definizio kronologikoarekin, ordea, garaiko isoglosa bakoitzaren egoera argitu nahi da, denboraren poderioz, munduko hizkuntza bizi guztietan bezala, aldatu egiten baitira.