Bihar, ekainak 3, ostirala, Euskal Herriko Unibertsitateak urteko ekitaldirik hunkigarrienetako bat ospatuko du: UPV/EHUko mugikortasun programetako ikasle bisitariei agurra. Jai giroan, Eva Ferreira errektoreak eta Junkal Gutiérrez Euskara, Kultura eta Nazioartekotzearen arloko errektoreordeak agur esango diete gure Unibertsitateko enbaxadorerik onenak bihurtu direnei.

2021-2022 ikasturtean UPV/EHUko mugikortasunak, Nazioartekoak zein SICUE programetakoak, pandemia aurreko mailara etorri da ia ia, gradu, zein graduondo mailetan. Hain zuzen ere, aurten 1.472 ikasleek aukeratu dute gure unibertsitatea mugikortasuna egiteko: 950 Erasmus + programaren bitartez, 236 Latinoamerikako programaren bitartez, 69 Beste Norako eta 217 SICUE programen bitartez. UPV/EHUko ikasleei dagokienez, ikasleen kopuruak ere goraka egin du, 2.198 ikaslek aukeratu baitute ikasturte honetan kanpoan ikastea. Hauetatik 1.375 ikaslek Erasmus+ programan egin dute mugikortasuna, 202 Latinoamerikakoan, 82 Beste Norakoan eta 539 SICUEn.

“Ikasleen etorkizuneko garapenean nazioartekotzeko esperientzia izatea behar-beharrezkoa da. Nazioarteko esperientziak lan-merkatuan sortzen diren erronka berriei aurre egiteko tresnak garatzeko aukera ezin hobea da: munduko joera demografikoak (populazioaren zahartzea mendebaldeko herrialdeetan, desberdintasunen gorakada),  globalizazioa, berotzea eta ingurumenaren aldaketa, trantsizio digitala eta ekologikoa, ezagutzaren bilakaera azkarra, eleaniztasunaren eta kulturartekotasunaren garrantzia”, adierazi du Junkal Gutierrezek. Halaber, Euskara, Kultura eta Nazioartekotzearen arloko errektoreordeak nabarmendu du ikasle atzerritarrak ikasgeletan egoteak aukera ematen diela gainerakoei nazioarteko esperientzia bat etxean bizitzeko.

Edwin, María Ignazia, Xareni, Max, Inés eta María dira bisitatu gaituzten gazte horietako batzuk, eta bizipenez betetako motxila batekin etxera joateko prestatzen ari dira. Zergatik aukeratu gintuzten eta beren esperientzia nola baloratuko zuten galdetu diegu. Hona hemen erantzunak:

María Ignacia Sáez

Han: Universidad del Desarrollo de la Ciudad de Concepción (Chile)

Hemen: Medikuntza eta Erizaintza Fakultatea (Erizaintzako Gradua)

“Euskal Herriko Unibertsitatea izan zen ateak zabal-zabal ireki zizkidan lehena, eta babes osoa eskaini zidan. Argi eta garbi, esperientzia honetatik gehien gustatu zaidana kultura berriak ezagutzeko aukera izan da, irakaskuntza-metodoa eta karrera beste ikuspegi batetik esperimentatzea, baina, batez ere, irakasleek etxean bezala sentiarazi nauten maitasuna eta berotasuna. Egonaldiko txarrena?  Batzuetan, nire familiarekin edo lagunekin ezin komunikatzea, ordutegi-aldea dela eta. Hala ere, horrek ere pertsona gisa hazten lagundu dit. Pertsona bakoitzak noizbait bizi beharko lituzkeen esperientziak dira. Zalantzarik gabe, esperientzia errepikatuko nuke, zure etorkizunerako bizitza eskaintzen dizun aukera bakarra baita, bai profesionalki, bai hazkunde pertsonalean.”

Xareni Alvarado

Han: Universidad Nacional Autónoma de México

Hemen: Psikologia Fakultatea (Psikologiako Gradua)

“Dena berez sortu zen, Finlandiako unibertsitate batean nire Erasmus egiteko asmoa nuen, baina ingeleseko ziurtagiriarekin izandako atzerapen batzuengatik, UPV/EHU izan zen nire aukerarik onena eta erakargarriena. Zalantzarik gabe, nazioarteko gainerako ikasleekiko adiskidetasuna ezagutu, landu eta sortzea izan da hemengo egonaldiko esperientziarik onena, nire kontinente bereko (latinoamerikarrak) ikasleak ezagutzetik hasi eta hainbat hiritako Europako beste ikasle batzuetaraino. Hala ere, eskoletara, ebaluaziora eta irakaskuntzara egokitzeko uste baino denbora gehiago behar izan nuen, baina Erasmuseko lagunen eta irakasleen laguntzarekin konpondu nuen. Horregatik, nire buruarekin guztiz zintzoa izanik, ez dut uste esperientzia errepikatzea benetan gustatuko litzaidakeela, baina ikaskuntza asko eman dizkit.”

Edwin Cantor

Han: Universidad EAN de Colombia

Hemen: Ekonomia eta Enpresa Fakultatea (Negozioen Kudeaketako Gradua)

“Euskal Herriko Unibertsitatea aukeratu nuen, Espainiako unibertsitate onenen artean dagoelako. Nire egonaldiko onena izan da Euskal Autonomia Erkidegoan izandako harrera-esperientzia eta hemengo garapen ekonomikoa, une honetan lehiatzen ari naizen ekintzailetza-txapelketa batean parte hartu ahal izatea, Lanbiderekin batera lanbide-mailako ikastaro bat eta Iparteken web-teknologien sistemen programazioari buruzko prestakuntza egin ahal izana. Okerrena izan zen bizikleta lapurtu zidatela eta, ikasle gisa, ezin izan nuela lan egin diru-sarrera batzuk izateko eta aisialdian edo Espainiako leku turistikoetan gozatzeko. Ikasteko baliabideak baino ezin izan ditut izan, eta kito. Hala ere, errepikatuko dut. Unibertsitateak dagoeneko eman dit hurrengo ikasketa-aldirako onarpen-gutuna.”

Inés Villodre

Han: Gaztela-Mantxako Unibertsitatea

Hemen: Gizarte eta Komunikazio Zientzien Fakultatea (Kazetaritzako Gradua)

“Nire anaia SICUEn egona zen Donostian urte batzuk lehenago, eta oso pozik dago esperientziarekin. Gero, ikasketa-planei begira egon nintzenean, UPV/EHUkoa zen gehien interesatzen zitzaidanetako bat, eta, batez ere, Bilbo zen gehien interesatzen zitzaidan hiria. Izan ere, niretzat kultura-trukea izan da onena. Jendea ezagutzearen bidez edo jardueren bidez, asko aberastu nauen ezagutza eta ezagutza kulturala eskuratu dudala iruditzen zait. Hala ere, kosta egin zitzaidan distantziara ohitzea, puntualki behintzat. Nire etxetik bostehun kilometro baino gehiagora hiri berri eta guztiz ezezagun batean egotera bakarrik ohitzea ariketa interesgarria da. Hala eta guztiz ere, esperientzia erabat errepikatuko nuke. Oso eskertuta nago Espainia barruan elkartrukera joan izanaz, oso esperientzia interesgarria dela uste dut, oso bestelako kultura ezagutzeko aukera ematen dizuna atzerrira irten gabe, Euskal Herritik, aldi berean hain desberdina eta hain antzekoa izanik.”

Max Kämmerling

Han: Karlsruher Institut für Technologie (Alemania)

Hemen: Bilboko Ingeniaritza Eskola (Energia Berriztagarriak Itsas Ingurunean (REM PLUS) Erasmus Mundus masterra)

“Surf eta eskalada zale amorratua naizenez, hiriaz (Bilbo) eta inguruez maitemindu nintzen. Gainera, itsasoko teknologia eolikoan interesatu nintzen nire lehen egonaldian, sektore hori garrantzitsua baita eskualdean. Beraz, oso pozik nago berriro hiri honetan egoteko aukera izateaz. Bilboko porturako  bisita teknikoa eta kostaldeko haize-egitura erraldoirakoa izan da onena seihileko honetan. Era berean, oso interesgarria iruditu zitzaidan Bilboko BECen egin zen WindEurope-ra, Europako energia eolikoaren erakustaldirik handienera joatea. Eta asko gozatu nuen Wolfame taldeak, nire talde australiar gogokoenetako batek, Antzoki kafetegian eskaini zuen kontzertuan. Hala ere, janari begetarianoa jateko aukera eskasa izan da nire egonaldiko gauzarik txarrena. Nire karbono-aztarna minimora murrizten saiatzen naiz, eta zati handi bat nire haragi-kontsumoa nabarmen murriztea da. Alemaniako aukera begetariano eta begano askotara ohituta nago. Hori ez da horrela izan Bilbon. Espero dut hori aldatzea datozen urteetan, eta Bilbo gero eta sentikorragoa izatea gai horrekiko. Hala ere, behin eta berriz itzuliko  nintzateke.”

María Leiva

Han: Universidad de Santiago de Chile

Hemen: Psikologia Fakultatea (Psikologiako Gradua)

“Euskal Herriko Unibertsitatea aukeratu nuen trukea egiteko, hari buruzko erreferentzia onak nituelako. Aukerarik onena zen nire unibertsitateko truke-ikasle gehiagorekin partekatzeko eta prozesuan modu ez hain zakarrean integratu ahal izateko. Uste dut nire esperientziaren barruan hoberena euskal kulturaren zati bat ikastea, leku berriak ezagutzea eta leku horietan konta daitekeen historiaz blaitzea. Txarrenari dagokionez, ebaluazio-sistema. Irakasgaiak gainditu nituen, baina uste dute ez zela hain estresagarria izan behar. Zalantzarik gabe, esperientzia errepikatuko nuke, eta ziur aski orain egin dudan modu berean. Txileko lagun batzuek datorren lauhilekoan unibertsitate honetara etorri nahi dute, eta haien gogoaren zati bat nire esperientzia onetik eta esperientzia errepikatzeko dudan irrikatik sortzen da, noizbait berriro aukera izaten badut.”