María Saiz Santos, Ekonomia eta Enpresan doktorea eta UPV/EHUko Ekintzailetza eta Enpresa Zuzendaritza masterreko zuzendaria, eta Igor Campillo, Fisika Zientzietako doktorea eta Euskampuseko zuzendari exekutiboa, Spanning Boundaries Agents Between Academia & Industry zerrendan agertzen dira, Unibertsitatea-Enpresa harremanen eta lankidetzaren arloko munduko 33 pertsona nabarmenenen artean. Gidak munduko hainbat eremutako eragileen lana islatzen du: Hego Europakoena (Campillo eta Saiz hirugarren eta seigarren postuan daude, hurrenez hurren), Ipar Europakoena, Mendebaldeko eta Ekialdeko Europakoena, Asia eta Ekialde Hurbilekoena eta Ipar Amerika eta Ozeaniakoena.

Argitalpenaren arabera, bai mundu akademikoa eta publikoa, bai enpresen mundua ulertzeko eta horietan jarduteko gaitasuna duten adituen profil profesionala dute, eta Campillo eta Saiz “unibertsitatea-industria-gizartea elkarlaneko txapeldunak” direla adierazten du. Iraunkortasuna, erresilientzia, komunikatzeko gaitasun bikainak eta ekintzailetza mentalitatea dira zerrendako kideak deskribatzerakoan aipatzen diren dohain komunak eta, zerrenda horretan, hainbat herrialdetako kideak daude; Alemania, Frantzia, Finlandia, Herbehereak eta Turkiakoak, besteak beste.

‘Boundary Spanning’ terminoa mugak gainditzeari erreferentzia egiten dio eta honako hau deskribatzen du: zientziaren eta negozioen munduak gizarteen erronkak konpontzeko elkarrekin lan egin behar duten garaian beren erakundeko barneko sareak beste esparru batzuetakoekin, modu berritzailean, lotzen dituzten pertsonak. Hala, “elkarlanean oinarritutako berrikuntzaren aldeko konpromisoagatik beren erakundeen barneko eta kanpoko mugak hausten dituzten” profesionalen aurrean gaude.

Saiz: «Gure potentzial zientifikoa eta teknologikoa lurraldean aberastasun eta enplegu bihurtzea gako estrategikoa da»

María Saizen kasuan, argitalpenak nabarmendu duenez, oinarri teknologikoko enpresen inkubagailuak kudeatu ditu finantza erakundeekin eta erakunde publikoekin bitartekoak lortzeko. Horrez gain, berak zuzentzen duen masterrean eta Global Entrepreneurship Monitor nazioarteko sarean egiten duen lana nabarmendu du. Urtero, 50 eta 60 herrialde artean parte hartzen dute sare horretan nazioarteko fenomeno ekintzailea neurtzeko. Igor Campillori dagokionez, Nazioarteko Bikaintasun Campusaren antolaketa eta ezarpena aipatzen dira (Euskal Herriko Unibertsitateak, Tecnalia korporazioak eta Donostia International Physics Center-ek osatzen dute), baita Euskal Autonomia Erkidegoko enpresei lehiakorrak izaten eta dibertsifikatzen laguntzeko NanoBasque estrategia diseinatzea edo 4GUNE Klusterrari bultzada ematea ere.

Campillo: «'Boundary spanner' batek erakundeen arteko harreman-esparrua eraldatzeko lan egiten du guztion ongia lortzeko»

Saizen aburuz, gidaliburuko aipamena "gure enpresa eta gizarte-ingurunearekiko konpromisoaren aldeko apustu baten emaitza da. Euskadiko Zientziako eta Teknologiako eragile nagusia gara eta 'Eman eta zabal zazu' leloa bete behar dugu. Gure potentzial zientifikoa eta teknologikoa lurraldean aberastasun eta enplegu bihurtzea gako estrategikoa da etorkizunerako, UPV/EHUrentzat eta inguruko unibertsitate-erakunde guztientzat. Irakaskuntza, Ikerketa, Transferentzia eta Ingurunearekiko Konpromisoa: azken batean, Unibertsitate Ekintzailea”.

Campilloren iritziz, unibertsitateei, enpresei eta beste eragile batzuei ikuspegi zabalago batekin pentsarazteko eta jarduteko gai diren pertsonak behar dira, eredu transakzionaletatik ihes eginez, interes partikularrak gainditzen dituzten erantzun kolektiboak hitzartzea ahalbidetzen duten beste eredu batzuetara. "Nire ustez, hau da 'boundary spanner' bat: ez bitartekari bat, baizik eta erakundeen arteko harreman-esparrua eraldatzeko lan egiten duen norbait, guztion ongia lortzeko."

Herbehereetako University Industry Innovation Network-UIIN sareak prestatu du ‘Spanning Boundaries Agents Between Academia & Industry’ zerrenda hau.  Sare honek goi-mailako hezkuntza-erakundeen etorkizuna eta gizartean duen eragina lantzen du.