Universidad del País Vasco/Euskal Herriko Unibertsitateko Ingeniaritza Mekanikoa Saileko Gonzalo Carlos Gonzalo irakasleak zuzendu du proiektua, eta azterlanean hodi itxurako lehiatzeko txasis bat aztertzea eta egitea proposatu zen. Fabrikazio eredu horrek ahalbidetu egiten du egitura bat sortzea, non ibilgailuaren erresistentziaren eta pisuaren arteko lotura oso handia den; zehazki, Espainiako autocross lehiaketako Car Cross IV. dibisioaren kategorian dago.

Halako ibilgailuek prestazio handiak ematen dituzte, eta fabrikazio kostua txikia da. Alberto Urrutiaren azalpenei jarraikiz, "ibilgailuok serieko 600 cc-ko motozikleta propultsatzaileak dituzte, eta,horren eraginez,potentziak eta pisuak harreman estua dute". Real Federación Española de Automovilismo (RFEDA) erakundeak adostutako araudi bat dago, eta han adierazten dira kategoria horretako ibilgailuek izan beharreko ezaugarriak, homologaturik egon daitezen eta Espainiako lehiaketan lehiatzeko aukera izan dezaten.

Betekizun horien artean daude txasisa egiteko erabili beharreko altzairuzko hodi motak: RFEDAk horien segurtasun egitura homologatu behar du. Bestalde, materialen erresistentziari buruzko azterlana egin behar da, frogatzen duena egiturak eutsi egiten diela ezarritako parametroei. Gainera, egitura guztian ezin da gertatu zenbait karga kasuren araberako balioak gainditzen dituen hausturarik edo desitxuratze plastikorik.

Atal horiek eta beste batzuek osatu dute Vitoria-Gasteizko Ingeniaritzako UEko ikasle horrek eginiko lana, eta, Axier Parro Ribacobaren laguntzari esker, lehiatzeko car-cross ibilgailu bat egiteko aplikatu ahal izan da, etorkizunean merkaturatzeko.

Ibilgailua Espainiako autocross lehiaketan lehiatuko da, RFEDAk homologatu ondoren. Power Race Vehicle ‘PRV' izena eman zaio, etorkizuneko PRV Racing enpresaren izena omentzeko.

Argazkiak: UPV/EHU