EHUko familia enpresaren arloko ikerketak aitorpenak jasotzen jarraitzen du. Alejandro Domínguez prestakuntza bidean dagoen ikertzailea da Enpresa Institutuan–Enpresari Aplikatutako Ekonomia Institutuan, eta AJICEDE-Doctoral Colloquium saria eman diote Kordoban egin den AEDEM 2026ko Nazioarteko Urteko Bileran. Gaur egun familia enpresa txiki eta ertainek duten erronka nagusietako bat da eraldaketa digitalari eta negozio eredu jasangarriagoetarako trantsizioari aldi berean aurre egitea, eta hain zuzen ere, sari honek Domínguez jaunak arlo horretan egindako ikerketaren kalitatea eta potentziala aitortzen ditu.

AJICEDEk (Ekonomia Zientzietako eta Enpresen Zuzendaritzako Ikertzaile Gazteen Elkartea) emandako sariak Corporate Entrepreneurship in Family SMEs: Entrepreneurial Orientation, Dynamic Capabilities, and Innovation Pathways under the Twin Transition izeneko lana goraipatu du. Ikerketak aztertzen du nola garatzen dituzten familia enpresa txiki eta ertainek gero eta dinamikoagoak eta konplexuagoak diren inguruneetara egokitzeko gaitasunak, eta arreta berezia jartzen du ekintzailetza orientazioak eta gaitasun dinamikoek berrikuntzaren eta berritze estrategikoaren eragile gisa duten eginkizunean.

Proposamenaren abiapuntua twin transition edo trantsizio bikoitzaren kontzeptua da, eraldaketa digitalaren eta trantsizio jasangarriaren arteko bateratzea adierazten duena. Bi prozesu horiek aldaketa sakona ekarri dute enpresek lehiatzeko, berritzeko eta balioa sortzeko duten eran. Testuinguru horretan, familia enpresak aztergai bereziki garrantzitsuak dira beste enpresa eredu batzuetatik bereizten dituzten ezaugarriengatik, hala nola epe luzerako ikuspegia, negozioaren jarraikortasunarekiko konpromisoa eta familia esparruaren eta enpresa esparruaren arteko etengabeko elkarreragina.

Saritutako ikerketa Alejandro Domínguezek Amaia Masedaren eta Unai Arzubiagaren zuzendaritzapean egiten ari den doktorego tesiaren ardatz nagusia da.  Sariak aitortza garrantzitsua dakar gero eta dinamikoagoa, konplexuagoa eta zalantzazkoagoa den ingurune batean familia enpresek berritzeko, ekiteko eta beren gaitasun estrategikoak berritzeko erabiltzen dituzten mekanismoei buruzko ebidentzia berriak eskaini nahi dituen lan baten kalitateari, originaltasunari eta eragin potentzialari.

AEDEM 2026n jasotako aitortzaz gain, sariari esker Alejandrok Sevillan 2026ko azaroaren 18tik 20ra egingo den AJICEDEren IX. Biltzar Iberoamerikarrean parte hartu ahal izango du. Ekitaldi horretan  Iberoamerikako unibertsitateetako ikertzaile gazteak bilduko dira beren ikerlanak aurkezteko, kontrastatzeko eta aberasteko, ezagutzaren trukea eta nazioarteko sare akademikoen sorrera sustatzeko.