Deskribapena

Urriaren 8tik 22ra arte, Euskal Herriko Unibertsitateko Carlos Santamaría Zentroko Txillardegi aretoan, Donostian, ‘GATEPACeko Ipar Taldearen proiektuak (1930-1937)’ izeneko erakusketa ikusgai dago. Erakusketa 20th Century Architecture Technical and Cultural Studies-ek antolatu du, EHUkultura Gipuzkoaren laguntzarekin Sarrera librea da. Ordutegia: astelehenetik ostiralera, 8:00etatik 20:30era.

Erakusketak GATEPACeko Ipar Taldearen arkitektura-lanak aurkezten ditu (Grupo de Artistas y Técnicos Españoles para el Progreso de la Arquitectura Contemporánea). Zazpi urte besterik iraun ez bazuen ere (1930-1937), erakunde hark ekarritako berrikuntzak eta erakutsitako ausardiak goitik behera haizeberritu zuten arkitekturaren panorama gurean. Erakusketa 65 panelek osatzen dute. Horietatik 61 Ipar Taldearen proiektuei eskainiak dira; hots, GaTEPACeko euskal adarrarenei. Panel bana proiektu bakoitzeko, bere azalpen eta irudi adierazgarriekin. Gainerako panelek testuinguruaren berri ematen dute.