Jardunaldiak: Itsas Energia

Lehenengo argitaratze data: 2017/09/11

Ostiralean, irailak 15ean, 15.00tan, UPV/EHUko Gipuzkoako Ingeniaritza Eskolaren San Andres aretoan, Eibarren, itsas energiaren azken berrikuntzak aurkeztuko dira, Maynooth Unibertsitateko (Irlanda) ikertzaileen eskutik.

Maynooth Unibertsitateko (Irlanda) COER zentroak (Centre for Ocean Energy Research edo Itsas Energiaren Azterketarako Zentroa) hamarkada bat baino gehiago darama itsas energiaren aprobetxamendua aztertzen, batez ere olatuena. Bertako hiru ikertzaile datoz Eibarrera euren ildoa azaltzera: Nicolas Faedo argentinarra, Giuseppe Giorgi italiarra, eta Yerai Peña euskal herritarra eta Eibarko ikasle ohia.

UPV/EHUko Gipuzkoako Ingeniaritza Eskolak, Eibarren, Energia Berriztagarrien Ingeniaritzako gradua irakasten du, energia iturri hauen erabilera, energiaren aurreztea eta trantsizio energetikoaren nondik-norakoak irakasten dituena. Bere irakasketa jardueren barne, ikaslegoaren ezagutza jardunaldi osagarriekin sakontzea bilatzen du honelako jardunaldi teknikoekin. Jardunaldi hauek herritargora ere zabalik daude, une honetan gizarteak arlo energetikoan dituen erronkak ezagutarazteko.

Hitzaldiak:

  • Giuseppe Giorgi. Maynooth University (Ireland): "Modelación hidrodinámica lineal y no lineal para convertidores de energías de olas"
  • Yerai Peña. Maynooth University (Ireland): "Itsasoko olatuen eszitazio indarren estimazioa eta aurreikuspena"
  • Nicolás Faedo. Maynooth University (Ireland): "Control óptimo de convertidores de energía de olas"

• Eguna: 2017/09/15
• Ordua: 15:00
• Lekua: San Andres aretoa (GIE EIBAR)

 

Sarrera libre da, lekua bete arte.