Mekanika Aplikatuaren helburua solido zurrunen estatika, zinematika eta dinamikaren ezagupena da. Ezagutza hauek industri arloko ingeniaritzaren oinarri zientifiko eta teknikoak dira eta arlo honetako edozein ingeniarik beharrezkoak izango ditu bere lana burutzeko. Bestalde Ingeniaritza Mekanikoko graduaren barruan gai hau hurrengo kurtsoetako hainbat asignaturen oinarria da; Materialen Erresistentzia eta Elastikotasuna, Makinen Zinematika eta Dinamika, Makinen Diseinua, eta Industria Egiturak eta Eraikuntzak besteak beste.



Mekanika Aplikatuaren kontzeptuak kalkulu bektorialean eta aljebra matrizialean oinarriturik garatuko dira, grafikoki deskribatuko diren sistema mekanikoak aztertuz. Horrela ikasleak beharrezkoa izango du kalkuluaren eta aljebraren ezagutza eta hauen erabilera kontrolpean izatea.

Irakasgaiaren emaitza nagusia solido zurrunaren portaera ezagutzea da akzio mota ezberdinen eragina kontutan izanda. Portaera hau solidoaren estatika, zinematika eta dinamikaren ezagupenekin lortuko da. Aldi berean ikasleek ariketak ebazteko ahalmena garatuko dute teoriaren kontzeptuetan oinarriturik.



Ikasturte osoan jarraituko den gai zerrendari esker ikasleak ondorengo ezagutza eta ahalmen zehatzak lortuko ditu:



- Bektore labainkor sistema batek sortzen duen momentu erresultante eremua ulertzea eta sistema baliokideak sortzea.



- Masa banaketa baten ezaugarri geometrikoak kalkulatzea.



- Solido zurrunaren estatika menperatzea. Sistema mekaniko bat orekan egoteko akzioek eta loturek bete behar dituzten baldintzak ulertzea.



- Sistema mekanikoen oreka grafikoki aztertzeko Solido Aske Diagrama modu egokian planteatuz.



- Egitura giltzatu isostatikoen elementuek transmititzen dituzten indarrak kalkulatzea.



- Marruskadura indarrak barneratzen dituzten sistema mekanikoak aztertzeko gaitasuna.



- Kable batek jasaten dituen indarrak bere geometriarekin eta barne indarrarekin erlazionatzeko gaitasuna.



- Solido prismatikoetan barne indar eta momentuak kalkulatzeko gai izatea.



- Egitura elementu sinpleetan indar axialek, indar ebakitzaileek, momentu makurtzaileek eta bihurdurak sortutako tentsioak aztertzeko gai izatea.



- Solido zurrun baten azterketa zinematikoa egiteko gaitasuna, abiadura eta azelerazio eremuak edo higidura erlatiboa erabilita.



- Higidura laua duten sistemen ebazpen grafikoa egitea.



- Ariketa dinamikoak metodo ezberdinekin ebazteko gai izatea: Momentu Lineal eta Angeluarraren Teoremak edo Energia Mekanikoaren teorema erabilita.



- Ardatz finkoa duten solido zurrunen analisi dinamikoa egiteko gai izatea.



- Higidura laua betetzen duten mekanismoen analisi dinamikoa egiteko gai izatea.

1. BLOKEA: ESTATIKA



1. Gaia: KALKULU BEKTORIALAREN OINARRIAK

2. Gaia: MASA ETA GAINAZAL LAUEN GEOMETRIA

3. Gaia: SOLIDO ZURRUNAREN ESTATIKA

4. Gaia: MARRUSKADURA

5. Gaia: KABLEAK

6. Gaia: MATERIALEN ERRESISTENTZIAREN OINARRIAK



2. BLOKEA: ZINEMATIKA ETA DINAMIKA



7. Gaia: SOLIDO ZURRUNAREN ZINEMATIKA

8. Gaia: HIGIDURA LAUAREN ANALISIA

9. Gaia: DINAMIKAREN OINARRIZKO MAGNITUDE ETA TEOREMAK

10. Gaia: SOLIDO ZURRUNAREN DINAMIKA

11. Gaia: ARDATZ FINKOA DUEN SOLIDOAREN DINAMIKA

12. Gaia: HIGIDURA LAUA DUEN SOLIDOAREN DINAMIKA

Irakaskuntza ondorengo moduan antolatuko da astean zehar:



- Klase magistrala eta gela praktika astean 3 ordu dira guztira. Bertan oinarrizko kontzeptu teorikoak azalduko dira, teoremak garatuz, erabilitako adierazpenak frogatuz eta adibideak emanez. Klasean sortutako zalantzak argituko dira eta klasetik kanpo egiteko lanak proposatuko dira. Gainera, teoria aplikatzeko, ikasleei klasean bertan egiteko ariketak proposatuko zaizkie, ariketa lantzeko denbora utziko zaie eta irakaslea dudak argitzeko bertan egongo da. Oso gomendagarria da klase hauetara beti joatea teoria ulertzeko eta ariketen oinarria zein den jakiteko.



- Ikasleak bere kabuz egin beharreko ikasgelaz kanpoko lana astean 3 orduko lana izan beharko da. Ikasleek klasean ikusitako kontzeptu teorikoak errepasatu eta egindako garapenak ulertu beharko ditu. Hortaz gain ikasleak eGelan publikatzen diren ariketa bildumak landu beharko du bere aldetik. Kurtsoan zehar sortutako dudak momentuan argitzeko tutoretzak erabiltzea gomendagarria da.



-Azterketa garaian ikasleak beste 45 orduko lana egin beharko du bere aldetik gaia errepasatzeko.

• Azken Ebaluazioaren Sistema
• Kalifikazioko tresnak eta ehunekoak:
  • Garatu beharreko proba idatzia (%): 100

Mekanika Aplikatua ohiko deialdian gainditzeko beharrezkoa da eduki teoriko-praktikoetan definitu diren bi blokeen azterketak gainditzea. Bloke bakoitza gainditzeko bere azterketan gutxienez 5 nota lortu behar da 10etik.



Bloke bakoitzaren azterketan teoria eta ariketak galdetuko dira. Teoriaren barruan garapenak, azalpenak eta galdera teoriko-praktikoak eskatu daitezke, eta atal honen pisua azterketa guztian %20-40 tartean egongo da.



Urtarrileko azterketa garaian lehenengo blokea gainditzeko aukera aurreratua egongo da. Horrela ikasleak bloke hau dagoeneko gainditurik izanda iritsi daitezke ohiko deialdira. Ez da derrigorrezkoa urtarrileko azterketara aurkeztea.



Urtarrileko azterketa hau ohiko deialdiaren ebaluazio sistemaren barruan dago, ondorioz, bertan kodigo etikoaren kontrako portaera (azterketan kopiatzea edo beste motako iruzurrak) duen ikasleak ohiko deialdiaren notan 0 izango du. Kasu honetan ikaslea ohiko deialdian aurkeztu dela kontsideratuko da.



Ohiko deialdiaren azterketa egunean ikasle guztiek aukera izango dute bloke bakar batera edo bi blokeetara aurkezteko. Bi kasu hauetan ikaslea deialdira aurkeztu dela kontsideratuko da.



Ohiko deialdiaren azterketa finalera aurkezten ez den ikasleak Ez Aurkeztua kalifikazioa izango du. Ikasle hauek ez dute urtarrilean lortutako nota gordeta izango ezohiko deialdirako, naiz eta azterketa hori gainditurik izan.



Ohiko deialdiaren azterketa finalera aurkeztu diren ikasleei egindako azterketen notak gordeko zaizkie ezohiko deialdirako, beraz bloke bat dagoeneko gainditurik badauka gorde egingo zaio.



Ikasle bakoitzaren nota finala bi blokeen media izango da bloke bakoitzaren pisua %50 izanda. Media egiteko bloke bakoitzaren azterketa ezberdinetan ateratako notarik altuena erabiliko da.



Ohiko deialdiaren bukaeran bi blokeak gainditu gabe nota finala 4,0 baino gehiago denean, ikaslearen kalifikazioa 4,0 izango da.



Ebaluazio probetan kalkulagailua erabili ahal izango da bakarrik. Ondorioz ikasleek debekatuta izango dute liburuak, oharrak edo apunteak erabiltzea, bai eta tresna edo gailu telefoniko, elektroniko, informatiko edo bestelakoak erabiltzea ere.



Osasun irizpideek hala gomendatuko balute, ikaslearen ebaluaketa ez presentziala egin liteke, ‘e-gela’ plataformak eskaintzen dituen bitarteko telematikoak erabiliz: zereginak, galdetegiak eta abar.

Mekanika Aplikatua ezohiko deialdian gainditzeko beharrezkoa da eduki teoriko-praktikoetan definitu diren bi blokeen azterketak gainditzea. Bloke bakoitza gainditzeko bere azterketan gutxienez 5 nota lortu behar da 10etik.



Bloke bakoitzaren azterketan teoria eta ariketak galdetuko dira. Teoriaren barruan garapenak, azalpenak eta galdera teoriko-praktikoak eskatu daitezke, eta atal honen pisua azterketa guztian %20-40 tartean egongo da.



Ezohiko deialdiaren azterketa egunean asignatura gainditu gabe duten ikasleek aukera izango dute bloke bakar batera edo bi blokeetara aurkezteko. Bi kasu hauetan ikaslea deialdira aurkeztu dela kontsideratuko da.



Ohiko deialdira aurkeztu diren ikasleei egindako azterketen notak gordeko zaizkie ezohiko deialdirako. Ohiko deialdian aurkeztu ez den ikasleari ez zaio beste azterketen notarik gordeko (nahiz eta gainditurik izan).



Ezohiko deialdiaren azterketa finalera aurkezten ez den ikasleak Ez Aurkeztua kalifikazioa izango du.



Ikasle bakoitzaren nota finala bi blokeen media izango da bloke bakoitzaren pisua %50 izanda. Ohiko deialdian aurkeztu diren ikasleen media egiteko bloke bakoitzaren azterketa ezberdinetan ateratako notarik altuena erabiliko da.



Ezohiko deialdiaren bukaeran bi blokeak gainditu gabe nota finala 4,0 baino gehiago denean, ikaslearen kalifikazioa 4,0 izango da.



Ebaluazio probetan kalkulagailua erabili ahal izango da bakarrik. Ondorioz ikasleek debekatuta izango dute liburuak, oharrak edo apunteak erabiltzea, bai eta tresna edo gailu telefoniko, elektroniko, informatiko edo bestelakoak erabiltzea ere.



Osasun irizpideek hala gomendatuko balute, ikaslearen ebaluaketa ez presentziala egin liteke, ‘e-gela’ plataformak eskaintzen dituen bitarteko telematikoak erabiliz: zereginak, galdetegiak eta abar.

Klasean azaldutako teoria guztia eta ariketak.

Oinarrizko bibliografia

Mecánica vectorial para ingenieros, Estática. Beer, Johnston. Mc Graw Hill

Mecánica vectorial para ingenieros, Dinámica. Beer, Johnston. Mc Graw Hill

Mecánica para ingenieros, Estática. Shames. Prentice Hall

Mecánica para ingenieros, Dinámica. Shames. Prentice Hall

Mecánica aplicada, estática y cinemática. Bilbao, Amezua. Síntesis

Mecánica aplicada, dinámica. Bilbao, Amezua, Altuzarra. Síntesis

Mecánica para ingenieros, Estática. Meriam, Kraige. Reverté

Mecánica para ingenieros, Dinámica, Meriam, Kraige. Reverté

Curso de Mecánica. Bastero, Casellas. EUNSA

Web helbideak

https://www.journals.elsevier.com/international-journal-of-mechanical-sciences
https://www.asme.org/
http://ocw.upm.es/course/mecanica