DESKRIBAPENA

Derrigorrezkoa ez bada ere, oro har, Gradu Amaierako Lana (GrAL) Praktika Tutelatuei (PT) lotuta egingo da. GrALa gauzatzeko, ikasleek, banaka, proiektu, memoria edo azterlan original bat egin behar dute, zuzendari baten edo gehiagoren gidaritzapean, PT-ei lotutako gai bati buruz, edo titulazioarekin lotura daukan beste gairen bati buruz. Lan horretan ikasleek graduko ikasketa aldian jaso dituzten prestakuntza gaiak eta lortu dituzten ahalmen, gaitasun eta trebetasunak bildu eta garatuko dira.



TESTUINGURUA

'Gradu Amaierako Lana' Graduko azken kurtsoko bigarren lauhilekoko nahitaezko irakasgaia da eta Gradu Amaierako Lana eta Practicum moduluaren barruan dago. Irakasgai honek 10 kreditu ECTS ditu eta lauhileko bateko iraupena du.

GRALaren matrikula egin ahal izateko, ikasleak matrikulatuta izan beharko ditu ikasketa plana bukatzeko geratzen zaizkion irakasgai guztiak.

Gaitasunak:

1. Jasotako prestakuntza gaiak eta lortutako gaitasunak uztartzea GrALa egin, aurkeztu eta defendatzerakoan.

2. Ikerketa eremuan eskuragarri dauden iturri bibliografikoetan jasotako informazioa bilatzea eta aztertzea.

3. Idatzizko komunikaziorako trebetasuna garatzea.

4. Lanbidearekin lotutako lan bati buruzko txosten bat garbi eta labur ahoz azaltzeko eta jendaurrean defendatzeko gai izatea.

GRALa mota hauetakoa izan ahalko da:

1.Titulazioarekin lotutako gai bati buruzko berrikuspen bibliografikoa egiteko lana.

2.Lan praktikoa/esperimentala, UPV/EHUko laborategi, sail eta ikerguneetan egin ahal izango dena, baita enpresetako praktikak egiten diren zentro/erakunde edo enpresetan ere.

3.Beste mota bat.



Gai zehatzak ez dira beti berdinak izango, ikasleak eta zuzendariak proposatutako gaiaren araberakoak baizik. GrALa praktika tutelatuei edo enpresetako praktikei lotuta egiten denean, aldatu egingo da enpresa motaren eta ikasleak praktiketan egindako lanaren arabera. Edonola ere, GrALaren memorian ondokoak jaso beharko dira:

- Garatu beharreko kasua planteatzeko analisi eta sintesi gaitasuna.

- Informazioa bilatzeko eta eginkizunak planteatzeko fluxu logikoa eta egokia.

- Informazio argia eta behar bestekoa irudi, grafiko eta tauletan.

- Irtenbideak eta/edo ondorioak planteatzerako argudio koherenteak.

- Adituek ulertu ahal izateko besteko argitasuna eta zehaztasuna.



GrALaren egitura, estiloa eta idazkera zaintzeko oinarrizko arauak:

Aurkezten diren GrALen egitura, estilo arauak eta idazkera, ondoren zehaztutakoak izan beharko dira:

- Egitura:

Azala (Fakultateko logoa, titulua, egilea, titulazioa, ikasturtea adierazi)

Aurkibidea

Laburpena (gehienez, 250 hitz)

1.- Sarrera

2.- Helburuak

3.- Garapena: atal honetan egokitzat jotzen diren beste azpiatal sartu ahalko dira (3.1.- ; 3.2.- ; 3.3.- e.a).

4.- Ondorioak: atal honetan jaso beharko dira egindako jardueran nabarmendu nahi diren ideia orokorrak.

5.- Bibliografia: testuan txertatu behar da eredu estandarizatu bat erabiliz (Vancouver, APA, ISO…).

6.- Eranskinak (halakorik egonez gero).



- Estiloa eta idazkera:

Luzera: 20-25 orrialde, eranskinak barne. Azala, aurkibidea, laburpena eta laburduren zerrenda (baldin badago) ez dira zenbatuko. Onartzen den luzera gainditzen duen testua ez da lanaren kalifikazioan kontuan izango.

Testuaren edizioa: Arial 11 edo antzeko letra tipoa, testu justifikatua, 1,5eko lerroartea eta 2,5 cm-ko marjina alde guztietan.

Erreferentzia bibliografikoak, bibliografia, hitzez hitzezko aipamenak, taulak, grafikoak eta koadroak zuzendariaren ebaluazio errubrikan ezarritako ebaluazio irizpideekin bat etorri beharko dira.

Taulak eta irudiak testuan txertatu beharko dira eta bakoitzak bere izenburua edo legenda (tauletan gainean eta irudietan azpian) izan beharko du. Horrez gain, elkarren segidako zenbakiak izan beharko dituzte, eranskinek bezala. Eranskinok dokumentuaren bukaeran joango dira. Beharrezkoa bada, eranskinetan DIN A4 formatua ez duten dokumentuak onartuko dira, eta bakoitza orri bakar bat bezala zenbatuko da.

GrALaren Memoria bi aldetatik inprimatuko da.

Dokumentu elektronikoa pdf formatuan aurkeztuko da.



Halaber, Gradu Amaierako Lan hau Epaimahai baten aurrean aurkeztu behar izango da baliabide informatiko egokiak erabiliz, horretarako propio ezarriko den data jakin batean.

GrALak honako jarduera hauek barne hartuko ditu:

-Fakultatean ematen den titulazio bakoitzeko azkenengo mailako ikasleentzako informazio saioa, irakasgaia aurkezteko eta GrALaren arautegiari eta ezaugarriei buruz hitz egiteko (izen ematea, zuzendariaren esleipena, memoriaren formatua, matrikula, aurkezpena eta defentsa, ebaluazio irizpideak).

-Bilaketa bibliografikoari buruzko prestakuntza saioa, Campuseko Bibliotekarekin lankidetzan.

-Banakako tutoretza saioak zuzendariarekin. Gutxienez bi bilera adostea gomendatzen da: bata, bigarren lauhilekoaren hasiera aldera, eta bestea, bukaera aldera.

-GrALa egin, aurkeztu eta defendatzeko faseetan ikasleak bere zuzendariak gidatuta egingo duen bakarkako lana.



GrALaren faseak:

GrALa defendatu ahal izateko, ikasleak jarraian deskribatzen diren fase guztiak burutu beharko ditu ikasturte bakoitzean GrALerako ezarritako epeen barruan.

-Matrikula

-Zuzendaria esleitzea

-Gaia proposatzea

-GrALaren defentsarako eskaera

-GrALaren defentsa



Informazio guztia 'GrALa garatzeko gida'n eta 'GAURen erabilerarako laguntza gida'n zehazten da. Gida hauek Farmazia Fakultateko web orrian daude eskuragarri:

https://www.ehu.eus/eu/web/farmaziafakultatea/gradu-amaierako-lana

• Azken Ebaluazioaren Sistema
• Kalifikazioko tresnak eta ehunekoak:
  • Ahozko defentsa (%): 50
  • Banakako lanak (%): 50

Azken ebaluazioa:



Memoria idatzia: %50.

- %30 Zuzendaria.

- %20 Epaimahaia.

Ahozko aurkezpena eta defentsa: %50.



Irakasgaia gainditzeko, gutxienez %40 lortu behar da atal bakoitzean.



Ebaluazio irizpideei buruzko argibide guztiak Farmazia Fakultateko ‘GrALaren garapenerako gida’n zehazten dira:

https://www.ehu.eus/es/web/farmaziafakultatea/gradu-amaierako-lana



Gradu amaierako lanaren defentsa

-Aurkezpena 15 minutuan egin beharko da.

-Epaimahaiak gehienez 15 minutu izango ditu galdetzeko edo iradokizunak eta iruzkinak egiteko.



Ebaluazio errubrikak erabiliko dira ikasleei idatzizko lana eta ahozko aurkezpena prestatzen laguntzeko eta zuzendariei eta/edo epaimahaiko kideei probak ebaluatzeko lana errazteko.



UPV/EHUko ebaluazio probetan eta lan akademikoetan jokabide makur eta iruzurrezkoak eragozteari eta etika akademikoari buruzko protokoloaren 4.3 atalaren arabera:

- Zuzendariak plagio zantzurik aurkitzen badu GrALean, edo ikusten badu zorroztasun falta dagoela bibliografian autoreak aipatzerakoan, hala jakinarazi beharko dio ikasleari, akatsak edo desegokitasunak zuzendu ditzan lana aurkeztu aurretik.

- GrALaren aurkezpenean plagiorik antzemanez gero, epaimahaiak suspentso kalifikazioa (0,0) jarriko dio lanari.



Osasun egoerak txarrera egingo balu eta GrALen defentsa aurrez aurre egiteko aukerarik ez balego, bideo konferentziaz edo ikasle bakoitzaren eta ebaluazio epaimahaiko kideen arteko interakzioa ahalbidetzen duten beste online bitarteko batzuen bidez egiteko aukera erabiliko da.

Ezohiko deialdian ohiko deialdian aplikatu diren ebaluazio irizpideak eta prozedura jarraituko dira.



Ikasketa Amaierako deialdia eskatu duten ikasleek, otsaileko deialdia ‘Suspentso’ edo ‘Ez aurkeztua’ kalifikazioa baldin badute, ezohiko deialdiko defentsa eskaera uztailean egin beharko dute eta irailean aurkeztu eta defendatu.

Oinarrizko bibliografia

Bibliografia bilatzea irakasgai honen gaitasunetako bat da