Aurkezpena

Zuzendaria

 

Ongi etorria eman nahi dizut, zuzendaritza taldearen eta UPV/EHUren Gasteizko Ingeniaritzako Unibertsitate Eskolan lan egiten duten langile guztien izenean. Gertuko eskola gaituzu, bai ikasleentzat eta bai enpresetarako, eta kalitatezkoa eskaintzen dugun prestakuntzarengatik. Webgune honetan, ikastegian eskaintzen ditugun graduko titulazioei buruzko informazioa aurkituko duzu:

Hauez gain, Industria Antolakuntzaren Ingeniaritzako unibertsitate masterra ere eskaintzen dugu eta graduondoko hainbat ikastaro ere bai, hauetako batzuk industria 4.0ri oso lotuta.

1959tik ari gara ingeniariak prestatzen, eta ziurtatu ahal dizugu (horixe adierazi baitigute gure ikastegiko tituludunak lanean dituzten enpresek) gure ikastegian ematen den prestakuntza kalitate handikoa dela. Ingeniaritzaren arlo desberdinak ondo menperatzen dituzten 110 irakaslek osaturiko taldea dugu eta gure eskolan, egun, ia 900 ikasle ari dira hezten, oso ondo hornitutako eta eguneratutako laborategiak erabiliz. Hauez gain, bertako administrazio eta zerbitzuetako pertsonala eraginkortasun eta adeitsutasunaren eredu da.

Oraintsu, 2017ko abenduan, eskolak Zilarrezko A Kudeaketa Aurreratuaren Euskal Saria lortu du, Euskalit fundazioak bertako gestio sistemari egindako kanpoko ebaluazioa gainditu ostean. Euskal Herriko ingeniaritzako eskola bakarra gara ziurtagiri horren jabe dena, kudeaketa aurreratuaren ereduarekin bat etorritako gestio koherentea egiten dugula egiaztatzen duelarik, estrategiaren analisia, bezeroak (ikasleak), pertsonak, gizartea eta berrikuntza oinarri harturik. Jada 2006. urtean Euskal Gobernuaren zilarrezko Q-a jaso genuen.

Eskolan jardunaren kalitatearengatik dugun kezkaren lekuko, hona hemen zenbait datu. Ikasturte bakoitzean:

  • Gure titulatuen % 75etik gora aritu da enpresetako borondatezko praktiketan.
  • Titulatuen % 25ak egonaldirik egina du atzerrian.
  • Ehun bat lan eskaintza gestionatzen ditugu ingeniarientzat.

Praktika programa garrantzitsua dugu geure inguruneko bilbe industriala osatzen duten enpresa ia guztietan eta harreman programa finkatua  Europa eta Amerikako unibertsitateekin, honen ondorioz, parte hartzen dugu nazioarteko hainbat saretan.

Gero eta gehiago erabiltzen dira metodologia aktiboak gure irakasgaien eskolak emateko, esate baterako ikaskuntza kooperatiboa eta proiektu zein problemetan oinarritutako ikaskuntza; eta enpresek adierazi digutenaren arabera, tresna egokiak dira gure tituludunak lan merkatuan sartzen laguntzeko, metodologia horren bidez gaitasun oso preziatuak garatzen direlako, hala nola ekimena, autonomia, jarrera ekintzailea, aldaketetara egokitzeko ahalmena, dokumentatzeko eta komunikaziorako gaitasuna (ahozkoa, idatzizkoa eta grafikoa), talde lana, bezeroaren premietara egokitzeko ahalmena, eta lidergoa.

2017/18 ikasturtetik graduko titulazio berri bat eskaintzen dugu: Automobilgintzaren Ingeniaritza, bitariko edo  hezkuntza dualean eskainita, sektoreko enpresetan nahitaezko praktikak eginik, hirugarren eta laugarren ikastaroetan. Titulu honen eraketan esku hartze aktiboa izan dute sektoreko enpresa askok, gure lurraldean garrantzia handiko sektorea kontutan hartuz.

Irakaskuntzaz gain, ikerkuntza da gure lanaren lehentasunezko arloa. Gure irakasleen % 70tik gora da doktore eta ireki berri dugu, eskolako irakasleek zuzenduta, automobilgintzaren eta aeronautikaren sektoreetako doktorego industrialen bidea, industria 4.0 edo industria digitalaren arloan. Azken finean, lortu nahi da jakintza guzti hau ikasleengana irits dadila, bai eta, graduan zehar, zeinek bere intereseko arloetan ikertzeko aukera izatea ere.

Ikasleak, enpresak eta gizartea ditugu kezka eta ardura eta, horregatik, lan egiten dugu gure hezkuntza eskaintza gure ingurunearen premia aldakorretara moldatzen.

Animatu eta egin ibilaldi birtuala gure webgunetik honen guztiaren berri izateko. Zure esku eta esanetara gaude egin zein eskatu gura zenigukeen edozein iradokizun edo eskari hartzeko.

Xabi Sancho Saiz

Gasteizko Ingeniaritzako Unibertsitate Eskolako zuzendaria