CRI03 gaitasun espezifikoa: Zirkuituen teoria eta makina elektrikoen oinarriak ezagutzea eta erabiltzea.



CRI03 gaitasun espezifikoaren ikastearen emaitzak:



1.- Makina elektrikoko hastapenak ezagutzen ditu.



2.- Makina elektrikoko printzipioak ulertzen ditu eta makina elektrikoko ariketen analisian aplikatzeko trebetasuna du.



3.- Makina elektrikoen analisiei dagozkien metodo analitiko eta teknikoen bidez makina elektrikoak dituzten sistemen portaera identifikatu, sailkatu eta deskribatzeko trebetasuna du.



4.- Makina elektrikoak aukeratzean erabiltzailearen beharrak ulertzen ditu.



5.- Derrigorrezko konplimenduko prebentzio eta segurtasun araudiak kontuan hartuz, makina elektrikoko laborategiari dagozkien tresnak zuzenki erabiltzen ditu.



6.- Neurketa esperimentalaren edo simulazioaren oinarrizko metodoak zuzen erabiltzen ditu eta makina elektrikoko printzipioekin erlazionatuz, lortutako datuak aurkeztu eta interpretatzen ditu.



Zeharkako Gaitasunak:



Titulazioaren zeharkako gaitasun espezifikoa:

G011 - Etengabeko prestakuntza egiteko beharrezkoak diren ikaskuntza-trebetasunak garatzea, bai eta ondorengo ikasketei ekiteko beharrezkoak direnak ere, betiere autonomia-maila handiarekin, eta pertsona guztien giza eskubideekiko eta aukera-berdintasunarekiko errespetuan oinarritutako trebetasunak.



Zeharkako gaitasunaren ikastearen emaitzak:



- Ideiak formulatu, proposamenak eztabaidatu eta erabakiak hartzen ditu-



- Nahitaez bete beharreko legeria, espezifikazioak, erregelamenduak eta arauak aplikatzen ditu.



- Konponbide teknikoek gizartean eta ingurumenean duten eragina aztertu eta balioesten du, jasangarritasun-irizpideak aplikatuta.

1. gaia.- Makina elektrikoen hastapenak.

Gai honetan, elektromagnetismoaren oinarrizko legeak, makina elektrikoen funtsezko elementuak, potentzia izendatua, errendimendua, sailkapen orokorra eta horren analisi kualitatiboa deskribatuko dizkigute.



2. gaia.- Transformadore monofasikoak eta trifasikoak.

Gai honetan, transformadoreen funtzionamendua, saiakuntzak, zirkuitu baliokidea, erabilera, transformadore monofasiko eta trifasikoen analisia eta transformadoreen paralelo-konexioa landuko ditugu.



3. gaia.- Motor eta sorgailu asinkronoak.

Gai honetan, makina asinkronikoen osaera, funtsezko ezaugarriak, saiakuntzak eta zirkuitu baliokideak (motor eta sorgailu moduan) aztertuko ditugu.



4. gaia.- Elikadura bikoitzeko motor eta sorgailu asinkronoak.

Gai honetan, elikadura bikoitzeko motor eta sorgailu asinkronoaren portaera landuko dugu (aerosorgailuetan erabiltzen da).



5. gaia.- Motor eta sorgailu sinkronoak.

Gai honetan, makina sinkronikoen osaera, funtsezko ezaugarriak, saiakuntzak eta zirkuitu baliokideak (motor eta sorgailu moduan) aztertuko ditugu.

Irakasgai honetan irakaskuntza-metodologia aktiboak erabiliko dira (gela iraulia) ohiko metodologiarekin batera.

Irakaskuntza magistralean, esposizio eskolak, kontzeptuak argitu eta ikasleak irakasgaiaren atal garrantzitsuenetan orientatuko dira; ikasleei informazio aukeratu, ordenatu eta sintetizatua heldu araziz, eta beharrezko denean ikus-entzunezko aurkezpenak erabiliz. Ikaslearen parte-hartze aktiboa suspertuko da.

Gelako praktika, bakarka edo taldeka garatu ahal izango diren ariketa/eztabaida/lanen bidez, ikasleek irakasgaiaren gaiak, sakondu, finkatu eta konprobatuko dituzte



Laborategi praktikak. Laborategiko praktiketan esperimentazioaren bidez ikasleek irakasgaiaren oinarri teorikoak gehitu, sakondu, finkatu eta konprobatuko dituzte. Bakarka edo taldeka garatu ahal izango dira. oinarrizko kontzeptu esperimentalekin gidaturiko praktikak, praktika saioaren aurretik ikasleak praktikari dagokion gidoia izango du.



Garapen Iraunkorreko Helburuak lantzeko ariketak egingo dira ikasleek jasangarritasun irizpideak aplikatu dezaten.

ETENGABEKO EBALUAZIOKO SISTEMA



Irakasgaiaren ebaluazioa etengabeko ebaluazioko sistemarekin egingo da, amaierako proba idatzi bat eta lauhilekoan zehar ebaluazio jarraitua konbinatuz. Kalifikazio tresnak ondorengoak dira:



GARATU BEHARREKO PROBA IDATZIA: (AZTERKETA IDATZIA). Probaren pisua irakasgaiko azken notaren %70ekoa da. Idatzizko azterketa izango da. Azterketa deialdirako ezarritako data ofizialean egingo da. Azterketa bi ataletan banatzen da:



a)garapen galderak edo/eta test galderak

b)ebatzi beharreko ariketak.



Azterketa idatzia gainditzeko, azterketaren atal bakoitzean, gutxienez 10etik 4 atera behar da.



LABORATEGI PRAKTIKAK: Praktiken pisua irakasgaiaren azken notaren % 15ekoa da. Etengabeko ebaluazioan gainditutako laborategiko praktiken emaitzak gordeko dira ezohiko deialdirako. Laborategi praktiken saio guztiak dagokien egun eta orduan egitea derrigorrezkoa izango da kalifikazioan 10etik gutxienez 5 ateratzeko.



ENTREGATZEKOAK: Entregatzekoen pisua irakasgaiaren azken notaren % 15ekoa da. Entregatzekoak ikasgai-zerrendarekin erlazionaturiko ariketa edo/eta galdera edo/eta test-galdetegiak edo/eta lanen bakarkako edo taldeko ebazpena dira. Jarduera gela praktiketako orduetan edo gelaz kanpo landu ahal izango da eta beharrezko denean, jarduera egiteko edo entregatzeko, egela plataforma erabiliko da.



Irakasgaiaren azken kalifikazioa aurretik azaldu diren kalifikazioen batura eginez aterako da, baina ondorengo baldintzak betetzea ezinbestekoa izango da batura egiteko:

- Azterketa idatzian, azterketaren atal bakoitzean, gutxienez 10etik 4 atera behar da.

- Laborategiko praktiken saioen % 100 parte hartzea eta laborategi ataleko kalifikazioan gutxienez 10etik 5 ateratzea.

Aurreko baldintzetako bat ez bada betetzen, ez da egingo baturarik. Eta GAUReko aktan agerturiko nota azterketa idatzian lortutako nota izango da (10etik) edo 4, bietan txikiena.





Irakasgaia gainditzeko, 5 edo gehiagoko kalifikazio orokorra lortu behar da.





Osasun egoerak aurrez aurreko irakaskuntza edota ebaluazioa eragotziz gero, onlineko jarduerara joko da eta ikasleei aldaketa horren berri emango zaie.





AZKEN EBALUAZIOAREN SISTEMA



Graduko Titulazio Ofizialetako Ikasleen Ebaluaziorako Arautegiaren 8. artikuluaren arabera, ikasleek eskubidea izango dute azken ebaluazio bidez ebaluatuak izateko. Eskubide hori baliatzeko, ikasleak etengabeko ebaluazioari uko egiten diola jasotzen duen idatzi bat aurkeztu beharko dio irakasgaiaren ardura duen irakasleari eta, horretarako, bederatzi asteko epea izango du lauhilekoa hasten denetik kontatzen hasita. Irakasgaiari dagozkion gaitasun guztiak ebaluatu ahal izateko, irakasgaiaren materia osoa hartzen duen proba bakar bat egingo da. Proba azterketa aldi ofizialean egingo da eta proba horren atalak eta atal bakoitzaren balioak ondorengoak dira:



LABORATEGI AZTERKETA: Azterketaren pisua irakasgaiaren azken notaren % 15a da. Laborategian egingo den proba esperimentala eta probarekin loturiko galdera edo/eta kalkuluak.



IDATZIZKO AZTERKETA: Azterketaren pisua irakasgaiaren azken notaren % 85a da. Azterketa bi ataletan banatzen da:

a)garapen galderak edo/eta test galderak

b)ebatzi beharreko ariketak.



Irakasgaia gainditzeko ezinbestekoa izango da idatzizko azterketan azterketaren atal bakoitzean, gutxienez 10etik 4 ateratzea eta laborategi azterketan dagokion balioaren % 50eko nota minimoa lortzea. Aurreko baldintzetako bat ez bada betetzen, ez da egingo baturarik. Eta aktan agerturiko nota azterketa idatzian lortutako nota izango da (10etik), edo 4, bietan txikiena.





Irakasgaia gainditzeko, 5 edo gehiagoko kalifikazio orokorra lortu behar da.





Ikaslea idatzizko azterketara ez bada joaten, deialdiari uko egiten diola ulertzen da.



Osasun egoerak aurrez aurreko irakaskuntza edota ebaluazioa eragotziz gero, onlineko jarduerara joko da eta ikasleei aldaketa horren berri emango zaie.





UKO EGITEA



Graduko Titulazio Ofizialetako Ikasleen Ebaluaziorako Arautegiaren 12. artikuluaren arabera, etengabeko ebaluazioaren kasuan, azken probaren pisua irakasgaiko kalifikazioaren %40 baino handiagoa denez, nahikoa izango da proba horretara ez aurkeztea azken kalifikazioa «aurkezteke» izan dadin.



Azken ebaluazioaren kasuan, azterketa egun ofizialean egin beharreko probara ez aurkezte hutsak ekarriko du automatikoki deialdiari uko egitea.



Deialdiari uko egiten dioten ikasleek «aurkezteke» kalifikazioa jasoko dute.





MATERIAL, TRESNA ETA BALIABIDEEN ERABILERARI BURUZKO INFORMAZIOA



Normalean, ebaluazio probetan ikasleek debekatuta izango dute liburuak, oharrak edo apunteak erabiltzea, bai eta tresna edo gailu telefoniko, elektroniko, informatiko edo bestelakoak erabiltzea ere. Behar izanez gero, proba egiteko unean izendatu ahal izango dira debekatutako materialak uzteko tokiak.

Apunteak, ariketak eta laborategi-praktikak eGela-ren bitartez.

Oinarrizko bibliografia

"Makina Elektrikoak. Oinarrizko kontzeptuak eta aplikazio-ariketak". J. Mazon, J.F. Miñambres, M.A. Zorrozua, G. Buigues, V. Valverde.

"Makina Elektrikoak". M.A. Zorrozua, J.F. Miñambres, A.J. Mazón, I. Zamora.

"Máquinas Eléctricas". J. Fraile.

"Máquinas Eléctricas". S.J. Chapman.

"Máquinas Eléctricas y Sistemas de Potencia". T. Wildi

Gehiago sakontzeko bibliografia

"Máquinas Eléctricas y Sistemas de Potencia". T. Wildi

Aldizkariak

Ingeniería Energética.