Munduan dauden miliaka hizkuntzetatik, 23 bakarrik dira nagusiak besteen aldean eta egoera honen aurrean, irakasleak, politikariak eta liderrak batu dira hizkuntza eskubideak babestu eta eleaniztasuna bultzatzen duten politikak eskatzeko. Hori da Salzburgoko adierazpenak, Ama Hizkuntzaren Nazioarteko Egunean ezagutzera eman zen ekimenak, islatzen duena.

Adierazpena ingelesez idatzi zen eta ostean 30 hizkuntza baino gehiagora itzuli, horien artean euskarara. Bertan adierazten denez, “mundu osoko milioika pertsonari ukatu egiten zaie nortasuna ematen dieten beren komunitateko hizkuntzei eusteko, haietaz gozatzeko eta haiek garatzeko berezko eskubidea”. Bidegabekeria hori zuzentzeko adierazpenak gizarte eta gizabanako eleaniztunak babestuko dituzten hizkuntza politikak egitea eskatzen du. Hori lortzeko, gomendio batzuk eskaini eta ekiteko dei bat egiten du hezkuntzaren arloan arreta handia jarriz.

Eleaniztasun politikak eraginkorrak izateko adierazpenak interesdun pertsona eta erakunde guztiei dei egiten die; ikertzaileak, irakasleak, gizarte zibila, hedabideak, gobernuak, enpresak, lankidetza agentziak, beste batzuen artean, denek batera elaniztasunaren eta hizkuntza eskubideen alde egin dezaten.

Adierazpena, iazko abenduan egin zen bost eguneko saio batean idatzi zuten 40 parte-hartzaileek. Egun horietan 170 herrialdetako 36.000 pertsona baino gehiagok parte hartu zuten hausnarketan. Hausnarketa horren ardatzak honako hauek izan ziren: hizkuntza politiken garrantzia eta ondorioak; hizkuntzaren rola gizarte kohesioan; hizkuntzaren irakaskuntzarako estrategiak; eleaniztasunaren abantailak lanerako; eta hizkuntzaren eta hizkuntza aniztasunaren garrantzia Hezkuntzarekin lotuta dagoen Garapen Iraunkorrerako Helburua lortzeko.

Adierazpen osoa irakurri.