Donostia 2016 Fundazioak eta Bagera Donostiako Euskaltzaleen Elkarteak ‘Euskarriak' proiektua aurkeztu zuten martxoaren 10ean Tabakaleran. ‘Euskarriak', artea eta publizitatea bateratzen duen proiektua, 41 proposamenetik aukeratutako 10 ekimenek osatzen dute, eta aurkezpeneko saioan horietatik bi eman dute ezagutzera.

Lehenengoa, ‘Europako Hizkuntzen Mapa' izan da: bost metro zabal eta lau metro altu dituen egurrezko mapa, Tabakalerako kanpoaldean kokatu dutena. Mapa honek gure kontinenteko 91 jatorrizko hizkuntza irudikatzen ditu eta Europako hizkuntza aniztasunari hurbilketa bat da. Artelan honetan jazotzen diren datuak, berriki EHUko Munduko Hizkuntza Ondarearen UNESCO Katedrak, Azkue Fundazioaren laguntzarekin, eguneratu duen mapan oinarritzen dira, jatorriz CIEMENek landutakoa. Publikoak bertan agertzen diren hizkuntzak hobetu identifika ditzan, ‘Hizkuntza txikiak mundua handitzen du' goiburua duen egurrezko pieza honek, legenda bat ere badu.

Aurkeztutako bigarren ekimena, hiztegiak inprimatuko dituen hizkuntza-makina da. Hiztegi hauek 250 sarrera izango ditu euskaratik beste 60 hizkuntzetarako norabidean eta alderantziz (kurduera, islandiera eta guaraniera adibidez). Makinaren kokapena ez dute oraindik erabaki, baina hiriko leku ezagun eta jendetsu batean jarriko dute. Proiektu honetan hamar pertsona ari dira lanean Hirikilabs Hiri Laborategiaren egoitzan Tabakaleran, hizkuntza-makina diseinatzen, programatzen eta eraikitzen.

Xabier Payak, 2016ren kultur programen zuzendariak adierazi duenez, ‘Euskarriak' proiektuaren helburua, hiritarrak Europako hizkuntza aniztasunari buruz sentsibilizatzea da eta horretarako euskararekin dugun esperientzia ekarpen garrantzitsua izango da. Gainontzeko ‘EusKarriak' Donostiako auzoetan barrena "azalduko" dira herritarrak ustekabean hartuko dituela, antolatzaileek jakinarazi dutenez. Artikulu osoa irakurri.