Euskal Herriko Unibertsitateak, EMTESPORT eta Gipuzkoako Foru Aldundiaren lankidetzarekin berezko Master bat diseinatu dute kirolaren kudeaketaren arloan dagoen profesional adituen beharra betetzeko. Master berria aurkezteko ekitaldian izan dira: Agustin Erkizia, UPV/EHUko Gipuzkoako Campuseko errektoreordea; Goizane Alvarez, Gipuzkoako Foru Aldundiko Gazteriako eta Kiroletako zuzendari nagusia; José María Beraza, Ekonomia eta Enpresa Fakultateko Gipuzkoako dekanorde koordinatzailea; Errapel Ibarloza, Masterraren zuzendaria; eta, Eneko Macías, EmteSport entitate laguntzailearen kirol zuzendaria.

Kirolaren Kudeaketa berezko Master hau kirol sektoreko profesional tituludunei, Enpresen Administrazio eta Zuzendaritzako, Negozioen kudeaketako, Marketing, Ekonomia eta antzeko gradudunei eta Jarduera Fisikoaren eta Kirolaren Zientzietako gradudunei zuzendua dago.

Master berri honen berezitasuna, oinarri akademikoez gain, kirol kudeaketan lidergoa duen EMTESPORT euskal enpresaren partehartzean datza, kirol erakundeen eguneroko errealitatea kontutan izanik sortzen diren erronkei profesionaltasunez erantzutea bermatuz.

Egun, kirola, osasuna eta aktibitate fisikoak garapen jarraia dauka eta eragin zuzena dauka gizartean. Kirolaren sektorea ekonomia eta enplegu hazkunde aurreikuspen handienetako duen alor profesional bat da. Faktore askoren eraginaren ondorioz, kirol kudeaketan espezializatutako profesional gero eta gehiago behar dira, berebiziko garrantzia duen jakintza adarra delako kirol industriaren egungo eta etorkizuneko errealitateak eraginkortasunez kudeatzeko orduan. UPV/EHUko Kirolaren Kudeaketa berezko Masterrak eskari honi erantzuten dio.

Masterreko ikasleek 12 irakasgai gainditu beharko dituzte, adibidez ‘Kirol Enpresa eta Erakundeen Zuzendaritza Ekonomiko eta Finantzarioa’, ‘Zuzendaritza Abileziak’ edo ‘Teknologia Berriak Kirol Kudeaketan’. Hauetaz gain osagarri bikainak diren borondatezko praktikak egiteko aukerak izango dituzte kirol sektoreko enpresetan.

Masterra datorren ikasturtean hasiko da, urriaren 5ean, eta Euskal Herriko Unibertsitateko Ekonomia eta Enpresa Fakultatean, Donostian, emango da 2019ko abendura arte.