Shakespeareren sonetoak Juan Garziaren ahotsean
108. Zer hausnargai da, tintak biltzekorik
Zer hausnargai da, tintak biltzekorik,
gogo zintzoz ez dudanik zuretu?
Zer hizpide berri duket jada nik,
guztizkotzat baitzaitut maite-gurtu?
Deus ez, ene ttipi; baina otoizle
zuhur gisa nabil lelo beraren
—«zu ene, ni zure»— berriemaile,
lehen aiputik baiteritzut guren.
Maitasun eternal fresko hiztuak
ez ditu nozitzen adinaren hauts
eta ajea, ez zimur gaiztoak,
baizik antzina du oraintzen arauz;
aldiro baitu hor maitasun berri
itxuraz aspaldi zendu zen hori.