Oparia, zure oroitaulok, hor

burmuinean dauzkat, zehatz, betiko,

oroitzak baituke, ez denez galkor,

epe gabe iraunen, sekulako,

 

edota, bederen, garun-bihotzok

naturaz iraunkor diren heinean:

ahanzturak ez zaituzke, bi zerok

gal arteino, bere eskumenean.

 

Kaier xumean ez zen aski leku,

eta, gogoan baitzauzkat beti nik,

besteri ematera naiz ausartu,

bai baitut zuretzat taula hoberik.

 

Oroilagun batez baliatzea

nuke oroit-eza bidezkotzea.