Kemen-xahutze lotsarizko hori

lizun huts da; eta, huts larri, Lizun

zin-hausle da, odol-gose, gaitz-kari,

basa, latz, zakar, krudel, hondakizun;

 

gozatu orduko mespretxatua;

buruz harako grina, zeina fite

buruz hara baita gorrotatua,

beita zoragarri, zozo-atzipe;

 

zoro xerka, eta jabetzan berdin;

ukanik, ukaiten zein ukaiteko

gaitz; aho-gozo, gero jasanezin;

poz-uste zena, amets funts gabeko.

 

Hori jakinik, ez daki munduak

saihesten zeru horren infernuak.