Zin dagi Enek zinez dela zintzo;

sinesten diot zinezko gezurra;

jotzen edo nau ni ezjakin gaixo,

mundukeriei itsu, nola haurra.

 

Gazte-juzgua sasi-sinetsirik

—joana baitiakit adin on hori—,

faltsia diot baiesten xalorik;

egiak gaitu galgarri zuzen bi.

 

Zertako ez aitor hark ustel dela?;

zertako nik gorde zein zahar naizen?

Leial nahi du Amodiok gala;

galai adintsuk, urteak isiltzen.

 

Hala limurtzen dugu elkar gogoz,

geure tatxak zurituz gezur harroz.