Bai baitatorke, ausaz, aldia noiz

epaituko nauzun bekoki-zimur,

maite-kontuok kitatuz behingoz

auziari buru emanik zuhur;

bai baitatorke aldia zeinean,

eguzki-begi, agur eginik hotz,

utziko nauzun kale-bazterrean,

maitezko soa arrozturik zorrotz.

bai baitatorke, hain gaitz, aldi hori,

neure deusezean degizut murgil,

eskuaz bihotz-zin, neure aurkari,

zure zuzenen begirale umil:

utz nazazun, hainbat legek du indar;

maitatzeko, ezin ziorik ekar.