Goxatzen duzu lotsaizuna bera,

zeinak, har beltzak arrosari nola,

jaten dizun izen-pipil galbera:

hain baituzu ezti hobenon gela!

 

Zure aisiok lizunkoi hartzean,

mihiak dagike iruzkin zantar:

onespen duzu inork gaitzestean:

zure aipuak ontzen du ezein txar.

 

Oi, zer jauretxe aukeratu zuten

galbideok, zugan zer bizitoki,

non edertasun-estalkiek duten

makula oro zuritzen egoki!

 

Aizto fina nola, ez albaitzintez,

bihotz ene, kamuts, gaizki usatzez.