Euskal Herriko Unibertsitateko (EHU) Carlos Santamaria Zentroak José M. Asua irakasleari eskainitako omenaldia hartu zuen, laster erretiroa hartuko duela eta. Unibertsitateko komunitatea ikerkuntzari, belaunaldi berrien prestakuntzari eta unibertsitatearen eta industriaren arteko loturak sendotzeari eskainitako ibilbidea aitortzeko bildu zen.

María Paulisek eta José Ramón Leizak gidatutako ekitaldian, bost lagunek hartu zuten hitza, Asuaren ibilbide akademiko eta pertsonalaren etapa desberdinen ordezkari. Honako hauek parte hartu zuten: Mariaje Barandiaran, EHUko Kimika Fakultateko Ingeniaritza Kimikoko taldeko irakasle ohia; Agustín Urretabizkaia, Asuaren doktoregai ohietako bat; María Eugenia Saborido, POLYMAT Institutuko lehen kudeatzaile teknologikoa; David Mecerreyes, POLYMAT Fundazioko egungo zuzendari zientifikoa; eta José M. Asua bera, ekitaldiari amaiera eman ziona.

Ospakizunean, hainbat herrialdetako ikasle ohien eta kolaboratzaileen bideo-mezu ugari ere jaso ziren. Haien artean, polimeroen zientziako nazioarteko aditu ospetsuak zeuden: Mohamed S. El-Aasser, Lehigh Unibertsitatekoa; Christian Pichot, Frantziako Ikerketa Zientifikorako Zentro Nazionalekoa; Alex Penlidis, Waterlooko Unibertsitatekoa; Per Zetterlund, Hego Gales Berriko Unibertsitatekoa; Joseph Keddie, Surreyko Unibertsitatekoa; Costantino Creton, Parisko ESPCIkoa; eta Patrick Lacroix-Desmazes, Montpellierko Unibertsitatekoa.

Lekukotzek haren lanaren nazioarteko dimentsioa eta bere zuzendaritzapean prestatu ziren pertsonengan utzitako arrastoa erakutsi zituzten. Asuak 60 doktore-tesi baino gehiago zuzendu ditu eta EHUren, nazioarteko unibertsitateen eta sektoreko enpresen arteko lankidetza-sare zabala sortzen lagundu du.

EHUko Ingeniaritza Kimikoko katedraduna da Asua, eta haren ikerketa emultsio-polimerizazioan oinarritu da nagusiki. Prozedura horren bidez, uretan barreiatutako polimero-partikula txikiak ekoizten dira. Partikula horiek eguneroko produktu askotan erabiltzen dira, hala nola pinturetan, estalduretan, itsasgarrietan, ehungintzan eta eraikuntzarako materialetan.

Haren ondarearen funtsezko zati bat POLYMATen garapena da. POLYMATek EHUko Material Polimerikoen Unibertsitate Institutua eta POLYMAT Fundazioa biltzen ditu. Asuak, Juan J. Iruin irakaslearekin batera, unibertsitate-institutuaren sorrera bultzatu zuen 1999an, eta hamabi urtez izan zen haren zuzendari. Geroago, EHUk, Ikerbasquek eta Gipuzkoako Foru Aldundiak sustatutako ikerketa-zentroa den POLYMAT Fundazioa abian jartzen parte hartu zuen, eta haren zuzendari zientifikoa izan da.

Haren ibilbideak hainbat aintzatespen jaso ditu, besteak beste, Euskadi Ikerketa Saria, Espainiako Kimikako Errege Elkartearen Ikerketa Bikaintasunaren Saria eta Argentinako Gobernuaren LELOIR Saria. Gainera, Jakiundeko kidea da eta Frantziako CNRSren Kontseilu Zientifikoko kide izan da.

Omenaldiari amaiera emateko, bertaratutakoek elkarrekin egoteko aukera izan zuten. Agurrak etapa profesional bati amaiera eman zion, baina, aldi berean, Asuaren ondareak EHUn, POLYMATen eta bi erakundeen inguruan hazi diren ikertzaile-belaunaldietan bizirik jarraitzen duela erakutsi zuen.