Mende laurdena joan da UPV/EHUko katedradun eta idazle Jon Kortazarrek bere obran maisuki marraztu zuenetik euskal literaturak XX. mendean egindako ibilbidea. Hori dela eta, erakusketa ibiltari bat antolatu da, lehen aldiz Euskaltzaindian aurkeztu zena 2015eko urriaren 2an, "Euskal literatura XX. mendean. 25 urte" izenburuaren pean. Orain, Bizkaiko Campuseko Bibliotekak bere baitan hartu du erakusketa, gainera lagintxo bibliografiko bat gehitu dio, bai Jon Kortazarrena berarena eta bai berak liburuan aipatutako autoreetako batzuena, hala nola Lizardi, Orixe, Lauaxeta, Ramón Saizarbitoria, Bernardo Atxaga, Kirmen Uribe, Tere Irastortza, Xabier Lete, Harkaitz Cano, Anjel Lertxundi, Bitoriano Gandiaga, Arantxa Urretabizkaia, Juan Mari Lekuona…