Carlos Uriartek 2024ko otsailean defendatu zuen Solving partial differential equations using artificial neural networks / Deribatu partzialetako ekuazioen ebazpena neurona-sare artifizialen bidez izenburupean egindako doktorego tesia, eta saria eman diote ekarpen aitzindaria egin duelako, uztartu egin baititu deribatu partzialetako ekuazioak —oinarrizkoak dira naturako eta ingeniaritzako hainbat fenomeno deskribatzeko, hala nola, airearen fluxua, beroaren hedapena edo materialen portaera— eta neurona sare artifizialak —adimen artifizialeko ohiko tresna—.  

Aldi batean etengabe lanean aritu ondoren, lehenengo aitorpenak heldu ziren, eta Uriarte erabat harritu zen: "Poz ikaragarria sentitu nuen eta, batez ere, harridura handia. Ez nuen inondik inora espero. Albisteak banan-banan iritsi zitzaizkidan, eta, beraz, aitorpen bakoitzak zirraraz eta pozez betetzen gintuen", aitortu du Carlos Uriartek,"Martxoan lehen saria jakinarazi zidatenean, lorpen handitzat jo nuen. Gero, aitorpenak Europa mailara heltzea erabat ustekabekoa izan zen", adierazi digu Uriartek.  

Hurrengo helmuga: Australia 

Egun, BCAM-Basque Center for Applied Mathematics-en ari da doktorego ondorengo ikertzaile lanetan, Eusko Jaurlaritzaren Ikertzaile Doktoreentzako Hobekuntzarako doktoretza-ondoko Programaren babespean. “Nire lanaren helburua da aztertzea zelan lagun gaitzaketen neurona sareek problema hauek eraginkorrago ebazten. Horretarako, teknika berriak proposatzen ditut inteligentzia artifiziala matematikako kontzeptu klasikoekin uztartuz, problema bakoitzaren ezaugarrietara hobeto egokitzea lotzeko” azaldu digu Uriartek. Gainera, ekarpen horiek aplikazio praktikoak dituzte, adibidez: ingeniaritzan simulatzaile zehatzagoak lortzeko edo fenomeno fisiko konplexuak aurreikusteko. 

Programa horren barruan bi urtez arituko da nazioarteko ikerketa proiektu batean eta bat egingo du Australiako ikertalde batekin, hain zuzen ere, Pertheko (Australia) Curtin Unibertsitateko Zientzia eta Ingeniaritza Fakultateko Elektronika, Konputazioa eta Matematika Zientzien Eskolan. Carlos Uriarteren proiektuaren helburua da adimen artifizialaren arloko bere proposamenak meatzaritzan ezartzea lurrazpiko mapak egiteko. “Tesiko ildo berari eutsiko diot, baina, oraingoan, aplikazio eremuari begira. Era berean, lankidetza sareak zabaldu nahi ditut eta ideia teorikoak benetako aplikaziora eraman”,  adierazi digu Uriartek.  

Biografia 

Carlos Uriarte Matematika Aplikatu eta Konputazionaletan doktore da Euskal Herriko Unibertsitatean. Doktoregoaz gain, Konputazio Ingeniaritza eta Sistema Adimentsuak masterra dauka eta Matematiketako Gradua, biak EHUkoak. Ikerketako ibilbidea gehien bat BCAMen egin du, MATHDES-Mathematical Design, Modeling and Simulations taldean, eta EHUn, MATHMODE Mathematical Modeling, Statistics and Optimization taldean.  

Zientziaren arloan egin duen bidea oraindik ere laburra bada ere, izen handiko zentroetan egin ditu egonaldiak, Txilen, Kanadan, Kolonbian, Polonian eta Estatu Batuetan. Ekoizpen zientifikoaren arloan, hainbat argitalpen ditu inpaktu handiko aldizkarietan, eta hainbat aurkezpen zenbakizko metodoei buruzko nazioarteko biltzarretan. Bere lanak matematika aplikatua, adimen artifiziala eta konputazio ingeniaritza uztartzen ditu. 

Sari hauei esker, Carlos Uriartek hainbat gonbidapen izan ditu bere lana maila handiko ekitaldi zientifikoetan aurkezteko. Horien artean, adibidez: Jacques-Louis Lions XXI. Eskola Hispano-Frantsesak antolatutako Simulación Numérica en Física e Ingeniería (2025eko uztailaren 7tik 11ra Ciudad Realen); Young Investigators Conference YIC 2025 eta PhD Olympiad 2025 (irailaren 17tik 19ra, Pescaran (Italia)), eta  International Centre For Numerical Methos In Engineering zentroak zenbakizko metodoek ingeniaritzan duten erabilera ardatz hartuta 2026rako antolatutako biltzarra.