Deskribapena

Ostirala, abenduaren 2an, 13:00etan, UPV/EHUko Hezkuntza, Filosofia eta Antropologia Fakultateko areto nagusian, Donostian, 'Oihenart' Aforismoen VI. Lehiaketaren sari banaketa ospatuko da, aipatutako ikastegiaren festaren baitan. Sariak banatuko ditu Edurne Otamendi Garmendia Donostiako Udalaren Euskara Zerbitzu buruak.

Aurtengo edizioaren lehen saria Ekaiz Goikoetxeak jaso du, ‘Eman zu bizitzari‘ lanagatik.

Bigarren saria aldiz, Koldo Izagirrek aurkeztutako ‘Burua ankaz gora‘ lanak.

Halaber, hirugarren saria Juan Ramon Alberdik aurkeztutako ‘Bonsaiak‘ lanak jaso du eta  aipamen berezia aldiz, Oihane Garmendia Glariak, Erronkariko euskararen aldarria egiteagatik.

Lehiaketara aurkeztu diren lanak edizio honetan epaitu dituzte: Cristina Lasak (irakaslea), Juan Kruz Igerabidek (idazlea), Eider Rodriguezek (irakaslea),  Antonio Casado idazkari moduan aritu delarik.

UPV/EHUko Hezkuntza, Filosofia eta Antropologia Fakultateak, Donostiako Udaleko Euskara Zerbitzuaren laguntzaz, ‘Oihenart' izeneko aforismoen lehenengo lehiaketa abian jarri zuen 2010.ean.