Gipuzkoako Foru Aldundiko Jasangarritasun Departamentuak Klima Bai 2025 sariak eman ditu Naturkliman. Edizio honek sendotu egin du unibertsitate-komunitateak ekintza klimatikoarekin duen konpromisoa, eta 140 ikasle inguru bildu ditu, bai eta lurraldeko lau unibertsitateetako irakasleak ere: Euskal Herriko Unibertsitatea (EHU), Deustuko Unibertsitatea, Mondragon Unibertsitatea eta Tecnun.

Azken hilabetean, lehiaketak erronka eta dinamika parte-hartzaileak proposatu ditu bost ardatz estrategikoren inguruan – ura eta energia, mugikortasun jasangarria, kontsumo arduratsua, hondakinak eta biodibertsitatea –, kultura klimatikoa indartzeko eta egunerokoan ohitura jasangarriagoak bultzatzeko. Campusen parte-hartze aktiboak eta proposamenen kalitateak edizio bereziki dinamikoa markatu dute. Edizio horretan, gazteek berriro erakutsi dute gaitasuna dutela ezagutza beren ingurunea hobetzen duten ekintza zehatzetara eramateko.

Jasangarritasunerako foru-diputatu José Ignacio Asensiok eman dio hasiera ekitaldiari, eta nabarmendu du “klima-ekintzak aliantza sendoak eta begirada desberdinak behar dituela. Unibertsitateak eraldaketa-eragile bat dira; izan ere, hamarkada erabakigarri honek eskatzen dituen egiturazko aldaketak gidatu beharko dituzten pertsonak prestatzen ari dira beren ikasgeletan”. Asensiok azpimarratu duenez, “gazteen artean kultura klimatikoa indartzea funtsezkoa da eredu bidezkoago, erresilienteago eta jasangarriago baterantz aurrera egiteko”.

Lau unibertsitateetako ordezkariek ere parte hartu dute, eta balioa eman diote Klima Bai ekimenak sentsibilizazioan eta prestakuntza praktikoan duen zereginari. Aitzol Ezeiza, Ekintzailetza, Enplegagarritasun eta Transferentziako zuzendaria eta EHUko Joxe Mari Korta zentroko zuzendaria; Mari Jose Aranguren, Deustuko Unibertsitateko Donostiako campuseko eta Erakunde Harremanetarako errektoreordea; Eduardo Castellanos, Mondragon Unibertsitateko Ikerketa eta Ezagutza Transferentziaren koordinatzailea; eta Iñigo Gutierrez, Tecnuneko Garapen zuzendaria, bat etorri dira unibertsitateen eta erakundeen arteko lankidetza indartzeko beharra azpimarratzean, eredu jasangarriagoetarako trantsizioa bizkortzeko.

Hitz egin ondoren, sariak banatu dira. Ura eta Energia blokean, Tecnuneko Garapen zuzendari Iñigo Gutiérrezek aintzatespena eman dio Idoia Irigarayri, zeinak saria jaso baitu Deustuko Unibertsitateko ikasle Sugoi Reteguiren izenean. Mugikortasun jasangarriaren Eduardo Castellanos Mondragon Unibertsitateko Ikerketa eta Ezagutza Transferentziaren koordinatzaileak eman du, eta Agurtzane Arriaranek jaso du. Kontsumo arduratsuan, Deustuko Unibertsitateko errektoreorde Mari Jose Arangurenek saria eman dio Esther Estitxu Fernándezi. Azken horrek ere saria jaso du hondakinen blokean, kasu honetan, Gipuzkoako Foru Aldundiko Trantsizio Ekologikoko zuzendari Mónica Pedreirak emandako sari batekin. Biodibertsitate blokeak berriz ere nabarmendu du Esther Estitxu Fernándezen lana, EHUko ordezkari Aitzol Ezeizaren eskutik jaso baitu saria.

Unibertsitateek klima-ekintzan duten zereginari buruzko hausnarketa kolektiboa balioesten duen unibertsitate-erronka Tecnuneko Carmen Jacarentzat izan da, eta Naturklimako zuzendari nagusi Xabier Estebanek entregatu du. Azkenik, 2025eko edizioko sari orokorra, lehiaketaren aintzatespen gorenaren sinboloa, Jasangarritasuneko foru-diputatu José Ignacio Asensiok eman dio Esther Estitxu Fernándezi, zeina irabazle absolutua izan baita eta bizikleta elektriko bat jaso baitu.

Edizio bakoitzarekin, Klima Baik klimaren sentsibilizazioa sustatzeko, eragileen arteko lankidetza indartzeko eta unibertsitate-komunitatea lurraldeko trantsizio ekologikoaren erdigunean kokatzeko erreferentziazko ekimen gisa duen zeregina berresten du.