Euskal Herriko Unibertsitateko komunitatearen kide gehiago ageri dira aurten argitalpen zientifikoetan aipamen gehien dituzten ikertzaileen artean. Stanford unibertsitateak urtero egiten du Ranking of the World Scientists: World’s Top 2% Scientists zerrenda, eta aipatuenen % 2 horien artean gehitu egin dira EHUko ikerlarien izenak. Zehazki, 189 izen ageri dira (iaz, 168 izan ziren); kopuru azpimarragarria kontuan izanik EHU unibertsitate jeneralista eta elebiduna dela. 

Rankinean agertzen diren guztietatik 133 ikertzaile seniorrak dira (2024an 119 izan ziren). Kasu horretan, ikertzailearen lan-ibilbide osoan zenbat aldiz aipatu izan duten izaten da kontuan. Azken urteko zerrenda 2024an jasotako aipamenei dagokie. Horretan EHUko 157 izen ageri dira (iaz, 133 izan ziren). Bi kategoriak aintzat hartuta, bietan ageri dira EHUko101 kide, iaz baino 17 gehiago. 

Urtez urte hazten joan da Standorfen zerrenda honetan jasota ageri diren EHUko ikerlariak. Euskal unibertsitate publikoak urteetan zehar ikerketaren eta dibulgazioaren kalitatearen alde egin duen lanaren erakusle. Ikerketarako errektoreorde Jon Umerezen esanetan, “emaitza hauek icebergaren tontorra besterik ez dira, zatirik nabarmen eta ikusgarriena; baina, era berean, erakusten du gaina posible egiten duen oinarri zabal, sakon eta sendoa dagoela azpian”. 

Emaitzok adierazten dute nazioarte mailako akademian oso aintzat hartzen dela EHUn sortzen den ezagutza, egiten den zientzia eta, “azken batean, ondare global horri gure unibertsitateak egiten dion ekarpena oso esanguratsua dela”, dio Umerezek.  

Ikerketa errektoreordearen esanetan, zientzia lan lehiakor bezain kolektiboa da eta horren erakusle argienetako bat da kideen (peer) erantzuna norberaren ekarpenen aurrean: kritikarako, onarpenerako, desegiteko nahiz eraikitzeko; "beti da aurrera egiteko euskarri gisa hartu izanaren aitortza edo errekonozimendua”. 

Sailkapena egiteko, argitalpen zientifikoen inpaktuarekin lotutako hainbat parametro aplikatzen ditu Stanford Unibertsitateak; hala nola, indexatutako argitalpenen kopurua, beste zientzialari batzuek argitaratutako lanetan zenbat aldiz aipatu diren argitalpen horiek, h indizea, egile-kidetza, eta aurreko faktore guztiak uztartzen dituen azken adierazle bat. Gainera, alborapenak saihesteko, ikertzaile bakoitzaren metrikak konparatzeko aukera ematen du sailkapenak, nork bere bururi eginiko aipamenak saihestuz.  

Zerrendan agertzen diren EHUko kideak jakintza arlo guztiak ordezkatzen dituzte: Fisika, Filosofia, Kimika, Hizkuntzalaritza, Informatika, Ingeniaritza, Ekonomia, Osasun Zientziak, Hezkuntza edo Kirola, besteak beste. 

Senior zerrenda osoa (autoaipamenik gabeko puntuazio globalaren arabera ordenatuta): 

2024an gehien aipatu diren ikertzaileen zerrenda osoa (autoaipamenik gabeko puntuazio globalaren arabera ordenatuta):

Rankinga Elsevier BV aldizkarian argitaratu da, John P. A. Ioannidis-ek (Stanford Unibertsitatea) idatzitako artikulu honetan: August 2025 data-update for "Updated science-wide author databases of standardized citation indicators" [Elsevier Data Repository 2025, V8, doi: DOI: 10.17632/btchxktzyw.8].

Zerrendan agertzen diren kideak kontsultazeko: www.topscinet.com

*Zerrenda hauek Stanfordeko rankingean oinarrituta daude. Argibide gehiagorako jarri ahal zara harrremanetan Komunikazio Bulegoarekin.