Deskribapena

Bilboko Ingeniaritza Eskolak (EHU) eta The Pink Force Fundazioak jendaurrean aurkeztuko dute datorren ostegunean, ekainak 11, “The Pink Force Factory” proiektua. Ekimen hezitzaile eta solidario honen bidez, ikasleek R2-KT robotaren erreplikak eraikiko dituzte, Basurtoko unibertsitate ospitalean dauden adingabeei laguntza emozionala emateko. Berrikuntza teknologikoa, unibertsitate-prestakuntza eta gizarte-konpromisoa uztartzen ditu.

Aurkezpen-ekitaldia Bilboko Ingeniaritza Eskolako II-I Eraikineko Areto Nagusian izango da, 12:30ean, ekainaren 10etik 12ra bitartean egingo den RBVM 2026 Kongresuaren esparruan.

Aurkezpenean honako hauek hartuko dute parte:

• Andoni Serrano, The Pink Force Fundazioko presidentea. Ekimen solidario honen jatorria eta garapena aurkeztuko ditu, robotaren 1 eskalako prototipo batekin batera.
• Charles Pinto, Bilboko Ingeniaritza Eskolako zuzendaria.
• Itziar Cabanes, Unibertsitateko katedraduna eta Sistema eta Automatika Ingeniaritza Saileko Robotikako irakaslea.

Bilboko Ingeniaritza Eskolako (EHU) graduko eta masterreko ikasleek R2-KT robotaren erreplikak eraikiko dituzte, teknologia aurreratua txertatuz. Erreplikak bi formatutan garatuko dira:

• Tamaina txikiko robotak, minbizia duten haurren familien elkarteentzat edo gaixotasunari aurre egiten dioten adingabeentzat, betiere Fundazioak lagunduta.
• Tamaina errealeko robotak, The Pink Force Fundazioak ospitaleetan laguntzeko egiten dituen jardueretan soilik erabiltzeko.