Egituren eta elementu mekanikoen kalkuluan jarduten duen ingeniariak ezagupen teoriko eta praktiko egokiak eduki behar ditu. Horrela, egitura tipologia jakin baten eta honek jasaten dituen eraginen artean dagoen erlazioa azaltzeko gai izan behar da. Eraginak, aplikatutako zamak, tenperatura aldaketak, euskarrien mugimenduak, etab. izan daitezke, guzti hauen azterketa "Elastikotasuna eta Materialen Erresistentzia"-ren oinarrizko helburu delarik. Ager daitezkeen egituren tipologia desberdinen artean, irakasgai honetan pieza prismatikoekin osatutako egiturren portaera ikasiko da.



Irakasgiaren edukiak argiro bereizten diren bi bloketan banatu dira. Lehenengo gaian egituren eta benetako solido deformagarrien portaeraren sarrera bat aurkeztu ondoren, hurrengo lau gaietan Elastikotasunaren Teoriaren oinarrizko kontzeptuak aztertzen dira, hala nola, tentsioa, deformazioa, portaera legeak eta problema elastikoaren ebazpena. Arreta berezia eskaintzen zaie bi dimentsioko elastikotasun problemei eta tentsio eta deformazioen kalkuluan erabiltzen diren saiakuntza esperimentalei. Lehenengo bloke hau Hutsegite Teoriei eskainitako gaiarekin bukatzen da, eta aurreko Elastikoatasunari buruzko gaien eta ondoren datozen Materialen Erresistentziari buruzko lau gaien arteko zubi gisa jokatzen du. Lehenengoan, pieza prismatikoekin osatutako egituren tipologia desberdinak aurkeztu ondoren, sekzioko esfortzuen analisiari ekiten zaio. Ondoren, ardatzeko indarrari eta barra-sareei eskeinitako gaia dator. Azken bi gaietan, makurdura hutsean eta makurdura bakunean agertzen diren tentsio eta deformazioak ikasten dira, eta hauen aplikazioa aurkezten, egitura isostatikoen ebazpenerako.



Irakasgai hau Ingeniaritza Mekanikoa deritzon jakintza arloan kokatua dago eta, beraz, hura bezalaxe, "Solidoen Kalkulu Elastikoa" 2. mailako "Mekanika" eta "Mekanika Aplikatua" irakasgaietan oinarritzen da, berauek ezagutu eta menderatzea ezinbestekoa delarik ondoren, egitura eta elementu mekanikoen portaera solido deformagarrien ikuspuntutik ulertzeko funtsezkoak diren oinarriak erdietsi ahal izateko. Bistako da baita ere, ikaslea lehen mailako "Algebra" eta "Kalkulu"-ko oinarrizko kontzeptuak erraztasunez erabiltzeko gai izan behar dela. Kurtso berean ematen den "Mekanismoen Teoria eta Bibrazio Mekanikoak" izeneko irakasgaiarekin ere lotua dago. Irakasgai honen bitartez mekanismoen elementuek jasaten dituzten eskaerak zehaztu daitezke, jarraian, "Elastikotasuna eta Materialen Erresistentziak"-k eskaintzen dituen kalkulurako tresnak erabilita, tentsio eta deformazioak lor daitezkeelarik. Ondoren, diseinu erresistentearen prozesuari ekin diezaiokegu eta sistemaren sendotasuna bermatuko duten neurriak lortu. Ikasleak irakasgai honetan bereganatuko dituen oinarrizko ezagutzak, mekanikarekin lotuta dauden Graduko laugarren mailako beste hainbat irakasgairen oinarri ere badira, adibidez, "Egituren Teoria eta Eraikuntza", non aurkeztutako kontzeptu eta metodoak, pieza prismatikoekin osatutako egituren kalkulura hedatzen diren. Nabaria da baita ere "Makinen Kalkulua" edo "Makinen Elementuak" bezalako irakasgaiekin duen erlazioa, non tentsio eta esfortzuen kalkulua edo hutsegite teorien aplikazioak bezalako kontzeptuak argi edukitzea oinarrizkoa den. Azkenik, aipa dezagun "Elastikotasuna eta Materialen Erresistentzia" beste hainbat irakasgairen oinarri izango dela, batetik, Ingeniaritza Mekaniko Masterrean emango diren irakasgaietan (Ingeniaritza Mekanikoa Graduaren jarraipena) eta, bestetik, Industri Ingeniaritzaren Masterreko Mekanika adarrean (Industria Teknologiaren Ingeniaritzako Graduaren jarraipena).

Irakasgai honentzat Graduko Tituluaren memorian jasotako gaitasuna ondokoa da, Industri Adarrari arrunta den moduluari dagokiona, hain zuzen:



- Elastikotasunaren eta materialen erresistentziaren oinarrien ezagutza eta erabiltzeko gaitasuna.



Ikaskuntzaren emaitz bezala ikasleek ondoko beste gaitasun hauek ere erdiestea nahi da:



- Elastikotasunaren Teorian agintzen duten oinarrizko ezagutzak jaso, solido deformagarrien portaera aztertzeko ezinbestekoak direnak eta, ondoren, Materialen Erresistentzia menderatzeko.



- Portaera elastiko lineala duten solidoen analisiari bidea ematen dioten ekuazioak zehaztu, teoria elastiko-lineala balekoa egiten duten mugak finkatuz.



- Egituren kalkuluan aplikatzen diren hutsegite teoria desberdinak aukeratu eta erabiltzeko irizpideak ezagutu.



- Egituretako tentsio eta deformazioen kalkulurako zenbait teknika esperimental ezagutu eta hauen erabilieran trebatu.



- Barra sareetako tentsio eta deformazioak kalkulatzeko gai izan, egitura isostatiko zein hiperestatikoetan. Azken hauen analisia aurkeztean, indarren metodoan sakonduko da, batez ere.



- Tentsio eta deformazioak kalkulatzeko gai izan makurdurapean lan egiten duten egitura isostatikoetan.

EDUKI TEORIKOAK



1. SARRERA.

2. TENTSIOAREN KONTZEPTUA.

3. DEFORMAZIOAREN TEORIA OROKORRA.

4. SOLIDO ELASTIKOA.

5. ELASTIKO ARAZOA.

6. HUTSEGITEAREN TEORIA.

7. MATERIALEN ERRESISTENTZIAREN SARRERA. PIEZA PRISMATIKOEKIN OSATURIKO SISTEMAK.

8. ESFORTZU AXIAL SINPLEA.

9. MAKURDURAREN TEORIA OROKORRA. TENTSIOAK.

10.MAKURDURAREN TEORIA OROKORRA. DEFORMAZIOAK.





LABORATEGIKO PRAKTIKAK



1. SAIOA. TRAKZIO SAIAKUNTZA

2. SAIOA. ESTENSOMETRIA PRAKTIKA

"Elastikotasuna eta Materialen Erresistentzia" irakasgaiko edukiak ikasgai magistralen, gelako praktiken, mintegien eta laborategiko praktiken bidez irakasten dira.



Ikasgai magistraletan gai bakoitzeko eduki eta kontzeptu teorikoak aurkezten dira. Hartarako, ikasleak eskuragarri dituen irakasgaiko argitalpenak erabiliko dira, aurkezpena hainbat ariketa praktikoen laguntzaz argitzen delarik.



Gelako eskola praktikoetan, egitura eta elementu mekaniko desberdinei dagozkien ariketan ebazten dira, klase teorikoetan azaldutako kontzeptuak finkatzeko.



Lauhilebetean zehar hiru mintegi egongo dira, non hedadura handiagoko problemak ebatziko diren, aurreko azterketa deialdietan agertutakoak. Mintegietako talde txikien banaketak, ariketak era interaktiboan antolatzeko aukera ematen du, talde desberdinak osatuz mintegia daraman irakaslearen ikuskapenarekin.



Kurtsoan zehar laborategiko bi praktika egingo dira, non lehenengoak trakzio saiakuntzari dagokion. Bigarrenean estensometrian oinarritutako neurketa esperimentalarekin lotutako praktika burutuko da. Praktikak Ingeniaritza Mekanikoko Materialen Erresistentzia eta Egituren Laborategian egingo dira. Aldez aurretik, ikasleek praktikaren azalpen teoriko bat jasoko dute eta honekin lotutako ariketa baten ebazpen analitikoa egingo, banaka edo taldeka, praktika bakoitzaren arabera. Saioan zehar, ikasleek neurketa esperimentalak egiteko aukera izango dute taldeetan banatuta, lehenago egindako kalkuluak erkatu eta egiaztatu ahal izateko. Praktika bukatzean, txosten bat egin beharko dute, lortutako emaitzak eta ondorioak azalduz.



Ikasleek eGela plataforma birtualean ondoko materiala edukiko dute eskuragarri: ikaslearen gida, azterketetako ariketa proposatuak, mintegietan jorratzeko problemak eta azterketen deialdiak, hauen ebazpen eta notekin batera. Irakasgaiko talde guztiek material berdina edukiko dute eskuragarri eta aldiberean.



Osasun egoerak aurrez aurreko irakaskuntza edota ebaluazioa eragotziz gero, onlineko jarduerara joko da eta ikasleei aldaketa horren berri emango zaie.

• Azken Ebaluazioaren Sistema
• Kalifikazioko tresnak eta ehunekoak:
  • Garatu beharreko proba idatzia (%): 95
  • Praktikak egitea (ariketak, kasuak edo buruketak) (%): 5

Irakasgai honetan azterketa partzialetan oinarritutako ebaluazioa egitea erabaki da, materia libratzeko aukera ematen duena. Irakasgaiaren azken zatia azterketa finalean ebaluatzen da. Ikaslea ez bada partzialetara aurkezten edo beharrezkoa den nota ez badu lortzen, ebaluazio jarraituari uko egiten diola uste izango da.

Irakasgaia gainditzeko baldintzak ondokoak dira:



1.- Laborategiko praktika guztietan parte hartu

2.- 5.0 edo nota altuagoa lortu.



Laborategiko praktikek, bukaerako notaren %5 balio dute, eta idatzizko probek %95. Idatzizko probetan, problemak eta galdera teorikoak erantzun beharko dituzte ikasleek banaka. Lehenengo idatzizko probak irakasgaiaren lehen zatiari dagozkion edukiak libratzeko aukera emango du (4.0 edo nota altuagoa lortu beharko da bigarren zatira bakarrik aurkeztu ahal izateko). Lehenengo zatia gainditu dutelako bigarren zatira bakarrik aurkeztea erabakitzen dutenek, zati honetan 3,5 edo nota altuagoa lortu beharko dute. Horrela balitz, idatzizko proben bukaerako nota bi zatien batazbestekoa izango litzateke. Nahi izanez gero, ikasleek azterketa guztia egiteko aukera izango dute, lehenengo zatia gainditua eduki arren. Galdera eta ariketa teorikoek azterketako notaren herena balioko dute beti.



Azterketa egiteari uko egiten dioten ikasleen kasuak Euskal Herriko Unibertsitatearen araudiak dioenaren arabera zuzenduko dira.

Ezohiko azterketan irakasgi guztia barne hartuko duen proba egingo da beti, non ikasleak banaka eta idatziz, proposatutako problemak eta galdera teorikoak erantzun beharko dituen. Galdera eta ariketa teorikoek azterketako notaren herena balioko dute. Azkeneko nota Laborategiko Praktikak kontutan hartuta lortuko da.



Azterketa egiteari uko egiten dioten ikasleen kasuak Euskal Herriko Unibertsitatearen araudiak dioenaren arabera zuzenduko dira.

- "Elasticidad y Resistencia de Materiales", José Luis Alcaraz, Rubén Ansola, Javier Canales, José A. Tárrago, Estrella Veguería. Sección de Publicaciones de la E.T.S.I. de Bilbao, 2015.
- "Elasticidad y Resistencia de Materiales: Colección de Problemas de clase", José Luis Alcaraz, Rubén Ansola, Javier Canales, José A. Tárrago, Estrella Veguería. Sección de Publicaciones de la E.T.S.I. de Bilbao, 2016.

Oinarrizko bibliografia

- "Elastikotasuna eta Materialen Erresistentzia", Rubén Ansola. UEU, Udako Euskal Unibertsitatea, 2005.

- "Resistencia de Materiales". L. Ortiz Berrocal. McGraw-Hill, 1991.

- "Mecánica de Materiales" (2ª ed.), S.P. Timoshenko y J.M. Gere. Grupo

Editorial Iberoamericana, 1986.

- "Mecánica de Materiales" (2ª ed.), F.P. Beer y E.R. Johnston. McGraw-Hill, 1993.

- "Resistencia de Materiales", V.I. Feodosiev. Mir, 1980.

- "Problemas de Resistencia de Materiales", I. Miroliúbov et al. Mir, 1978.

Gehiago sakontzeko bibliografia

- "Advanced Mechanics of Materials (6th Ed.)", A.P. Boresi y R.J. Schmidt. John Wiley & Sons, 2003.
- "Advanced Strength and Applied Elasticity", A.C. Ugural y S.K. Fenster. Prentice Hall, 1995.
- "Mechanics of Materials (2nd Ed.)", R.R. Craig Jr. John Wiley & Sons, 2000.

Aldizkariak

- Int. J. of Mechanical Sciences, Elsevier.
- Int. J. of Solids and Structures,Elsevier.
- Mechanics of Materials, Elsevier.
- Computers & Structures, Elsevier.

Web helbideak

- https://egela.ehu.es/
- http://www.ehu.eus/es/web/ingenieria-mecanica
- es.scribd.com/doc/305851/Resistencia-de-materiales-Problemas-resueltos
- es.wikipedia.org/wiki/Resistencia_de_materiales