Lau egoitzetara hurbildu diren adin guztietako 15.000 pertsonak baino gehiagok parte hartu dute Zientzia Asteak urteurrena ospatzeko antolatutako doako ia 200 jardueretan. EHUk 25 urteko ibilbidea osatu du aurtengo edizioan zientzia modu atsegin eta dibertigarrian gizartera hurbiltzen. 6.500 lagunek baino gehiagok bisitatu dute Bilboko Bizkaia Aretoa, ia 2.800 Donostiako Tabakalerara hurbildu dira, 3.300 inguru  Bibat museoan eta Gasteizko beste leku batzuetan antolatutako jardueretara joan dira, eta beste 2.700 inguru Barakaldoko Clara Campoamor Zentro Zibikotik igaro dira.

25. urteurrena ospatzeko programazio berezia

25. urteurrenerako programazio bereziak 43 txoko zientifiko, 75 tailer, 10 ibilbide didaktiko eta 8 erakusketa , 11 hitzaldi, 6 ikuskizun bildu ditu, besteak beste, eta plastikoen eta mikroplastikoen gaia landu du, itsas kutsaduraren aurkako borrokan arreta berezia jarriz. Beste gai batzuk ere jorratu dira, hala nola azaleratzen ari diren material jasangarrien garapena, eraikin eraginkorren diseinua eta energia berriztagarrien eta mugikortasun iraunkorraren sustapena. Gainera, abangoardiako hainbat arlo jorratu dira, hala nola Adimen Artifiziala, robotika eta konputazio kuantikoa, Bizitzaren eta Osasunaren zientziekin batera (biomolekulen analisia, neurozientzia, farmazia eta minbiziaren aurkako ariketaren eragina). Zeharkako gaiekin osatu zen, hala nola, emakumeak zientzian duen ikusgarritasuna, astronomia, arkeologia, geologia eta paleontologia, eta kimikaren eta fisika kuantikoaren dibulgazioa, etorkizun teknologikoari zein egungo ingurumen- eta gizarte-erronkei begiratzen zien programa oso bat eskainiz.

Nabarmentzekoa da Bilboko, Donostiako eta Gasteizko egoitzetako erizaintzako eta osasun-zainketako txokoetan izandako parte-hartzearen arrakasta. Parte-hartzaileek zenbait prozedura ikasi zituzten, hala nola eskuak behar bezala garbitzea, zauriak sendatzea, bihotz-biriketako bizkortzea, garuneko istripu baskular baten detekzio goiztiarra, etab.

Aurten ere Zientzia Clubek publiko orokorraren arreta erakarri zuen. Ia 300 lagunek gozatu dute Zientzia Club , EHUko 15 ikertzaileek lau egoitzetan eskainitako bakarrizketetaz.

Azpimarratzekoa  da, halaber, konputazio kuantikoari buruzko Qskit Fall Fest jardunaldian izandako parte-hartzeak 110 pertsona bildu zituela eta “Abentura koantikoa" haurrentzako ikuskizunak 350 pertsona inguru izan zituela Bilboko eta Gasteizko saioetan. Global Innovation Day-ren barruan egindako unibertsitate arteko eztabaidan 300 pertsonek hartu zuten parte.

Ikastetxeen parte-hartze zabala: 5.500 ikasle inguru Zientzia Astean

Aurten ere ikastetxeek parte-hartze handia izan dute. Derrigorrezko Bigarren Hezkuntzako eta Batxilergoko 5.000 ikaslek baino gehiagok bisitatu dituzte txokoak eta tailerrak lanegunetan, goizez, Bilboko, Donostiako eta Gasteizko egoitzetan. Gainera, zentro horietatik Lurraren Zientziekin lotutako 71 irudi aurkeztu dira Argazki Geologikoaren XVII. Lehiaketara. Azaroaren 9an irabazleei sariak banatu zitzaizkien. Horrez gain, Barakaldoko egoitzan, lehen hezkuntzako 450 ikasle inguruk zientziaz gozatu ahal izan dute programatutako tailer eta ikuskizunetan.

Zientzia Astearen barruan, Ur tantetako biztanleak erakusketak zabalik jarraitzen du publiko orokorrarentzat. Gasteizko Natur Zientzien museoan egongo da ikusgai 2026ko urtarrilaren 12ra arte.

Zientzia Astea 2025 EHUk antolatzen du, Eusko Jaurlaritzako Zientzia, Unibertsitate eta Berrikuntza Sailaren eta Hezkuntza Sailaren laguntzarekin, eta Arabako Foru Aldundiaren, Gipuzkoako Foru Aldundiaren, Barakaldoko Udalaren, Donostiako Udalaren, Gasteizko Udalaren eta Vital Fundazioaren babesarekin. Jardueretako batzuk Europako Batzordeak finantzatutako G9-Science4All eta ORE4Citizens proiektuetan kokatzen dira, Marie Sklodowska-Curie/(MSCA) ekintzen bidez. Ekimen hori Europan karrera zientifikoak sustatzeko ekimena da, eta Horizonte Europa, EBko Ikerketa eta Berrikuntzarako Esparru Programaren barruan kokatzen da.